ՀՀ ոստիկանության կոլեգիայի նիստում նշել է ոստիկանապետ Ալիկ Սարգսյանը

«Ոստիկանության գործունեության գնահատման հիմնական չափանիշը պետք է լինի ոչ միայն հանցագործությունների բացահայտման ցուցանիշը, այլեւ քաղաքացիների սահմանադրական իրավունքների ու ազատությունների պաշտպանության արդյունավետությունը կամ քաղաքացիների հանգստության եւ վստահության մակարդակը»,–ՀՀ ոստիկանության կոլեգիայի՝ երեկ կայացած նիստում հայտարարեց ՀՀ ոստիկանության պետ, ոստիկանության գեներալ–մայոր Ալիկ Սարգսյանը։ Հանցագործությունների բացահայտման ոչ մի բարձր ցուցանիշ չի բարձրացնի կառույցի հեղինակությունը, մինչեւ համակարգն ինքը չզբաղվի հասարակության մեջ իր վարկի բարձրացմամբ։
Ոստիկանության պետի խոսքով՝ բնակչության շրջանում ոստիկանության հեղինակության բարձրացման համար նախ եւ առաջ խիստ կարեւոր է յուրաքանչյուր ծառայողի կողմից օրինականության պահպանումը, ինչին հասնելու համար պետք է հիմնովին վերակառուցել ՀՀ ոստիկանության գործելաոճը, ձեռնարկել միջոցներ ոստիկանության շրջանում քաղաքացիների հետ բարեկիրթ վերաբերվելու կուլտուրա սերմանելու, գործունեության ընթացքում օրինականության անշեղ պահպանման ուղղությամբ. «Ոստիկանության ծառայողին ոչ վայել արարք կատարելու համար ընդհանուր առմամբ կարգապահական տույժի են ենթարկվել 939 ծառայողներ, որոնցից 44—ն ազատվել են համակարգից, 12—ի պաշտոնն իջեցվել է, 8—ի կոչումն է իջեցվել։ Թույլ տրված տարբեր օրինախախտումների փաստով ՀՀ ոստիկանության ծառայողների կողմից հարուցվել է 45 քրեական գործ, որոնցից 22—ն ուղարկվել է դատարան»։
Ա. Սարգսյանը նշեց, որ ոստիկանության ծառայողի պատիվն արատավորող անձանց նկատմամբ ՀՀ ոստիկանության ղեկավարության վերաբերմունքը միանշանակ է. համակարգը վերջիններից ազատելու հարցում որդեգրվելու է անհրաժեշտ սկզբունքայնություն եւ վճռականություն։ Ոստիկանության ծառայողի պատիվն արատավորելու, քաղաքացիների նկատմամբ ցինիկ վարվելակերպ դրսեւորելու համար նախորդ տարվա ընթացքում համակարգից ազատվել են օպերլիազորներ, տեղամասային տեսուչներ.
«Այս ամենը, թերեւս, վկայում է այն մասին, որ անձնակազմի հետ տարվող աշխատանքներին մի շարք ստորաբաժանումներում անհրաժեշտ ուշադրություն չի դարձվում։ Այս առումով անհրաժեշտ է բարձրացնել ստորաբաժանումների անձնակազմի գծով տեղակալների եւ անմիջական ղեկավարների պատասխանատվությունը։ Ժամանակն է ընդունելու ոստիկանության ծառայողի վարվելակերպի կանոնները եւ մասնագիտական էթիկայի նորմերը կարգավորող իրավական ակտ»։
Ա. Սարգսյանը նշեց, որ ոստիկանության ղեկավարությանը հատկապես անհանգստացնում է հանցագործությունները չգրանցելու եւ ընթացք չտալու պրակտիկայի տարածումը։ Կենտրոնական ապարատի ծառայողների եւ մարզային վարչությունների կողմից կատարված ծառայողական քննություններով ի հայտ է բերվել նման 32 դեպք՝ նախորդ տարվա 10—ի դիմաց։ Ոստիկանության պետի համոզմամբ՝ այս երեւույթը նախ եւ առաջ նման գործելաոճը նպաստում է անպատժելիության մթնոլորտի ձեւավորմանը եւ վերացնում քաղաքացու վստահությունը ոստիկանության նկատմամբ.
«Ոստիկանության գործունեության նկատմամբ հանրապետության բնակչության անվստահության մասին է խոսում հետեւյալ փաստը. նախկինում ոստիկանության մարմիններին չհայտնված հանցագործությունների փաստերի վերաբերյալ ստուգումներով պարզվել է, որ տուժողները ժամանակին խուսափել են ոստիկանություն դիմելուց՝ ավելորդ քաշքշուկի մեջ չընկնելու (7 տոկոս), դրական արդյունքի հույս չունենալու (8 տոկոս) կամ հանցագործի վրեժխնդրությունից վախենալու պատճառով (2 տոկոս)։ Տուժողների 30 տոկոսն արդարությունը վերականգնելու հարցում ապավինել է միայն սեփական ուժերին։ Փաստորեն, տուժողների մոտ կեսը իրենց ոտնահարված իրավունքների վերականգնման գործընթացը չեն վստահել ոստիկանության մարմիններին, ինչի պարագայում մեծանում է հանցավոր հեղինակությունների դերակատարումը, ինչն էլ իր հերթին սասանում է ոստիկանության հեղինակությունը։ Մենք նման արատավոր երեւույթների դեմ տանելու ենք սկզբունքային պայքար՝ զուգահեռաբար ձեռնարկելով միջոցներ տարածքային մարմինների գործունեության գնահատման համար ժամանակակից չափանիշներ մշակելու համար»։
Նաեւ դրա հետեւանքով հաշվետու տարում բացահայտվել են կրկնակի շատ հանցագործություններ, քան նախորդ տարում, արդյունավետ են աշխատել գրեթե բոլոր տարածքային մարմինները, որոնց բացահայտման ցուցանիշները միջին հաշվով բարելավվել են 10 տոկոսով։ Ինքնությունը պարզված չլինելու պատճառաբանությամբ նախորդ տարիներին կասեցված քրեական գործերով հանցագործությունների բացահայտման ցուցանիշը լավագույնն է եղել վերջին տարիների ընթացքում։
2009—ին հայտնաբերված թմրամիջոցների ապօրինի շրջանառությունից հանված ծանր թմրամիջոցների քանակն աննախադեպ է վերջին տարիների ընթացքում։ Զենքի եւ զինամթերքի ապօրինի շրջանառության ոլորտում հայտնաբերված դեպքերի, ինչպես նաեւ արձանագրված եւ կամավոր հանձնած հրազենի թիվն ամենամեծն է վերջին 10 տարիների ընթացքում։
2009—ին հայտնաբերված կոռուպցիոն բնույթի հանցագործությունների թիվը եւս աննախադեպ է վերջին տարիների համար։ Նշված հանցագործությունների 76 տոկոսն ի հայտ է բերվել ոստիկանության մարմինների կողմից։ Նախորդ տարվա ընթացքում հանրապետությունում գրանցված ավտոպատահարների քանակը կտրուկ նվազել է, եւ ԱՊՀ երկրներում լավագույն ցուցանիշն է։