Կոռուպցիայի դեմ պետք է պայքարել բոլոր հնարավոր միջոցներով

Պետության զարգացման կարեւորագույն պայմաններից մեկը կոռուպցիան արմատախիլ անելն է, քանզի այն ոչ միայն խարխլում է պետականության հիմքերը, այլեւ բացասաբար է անդրադառնում հասարակության բարոյական արժեքների եւ իշխանությունների նկատմամբ հավատի վրա։ «ՀՀ կառավարության կողմից արդեն իսկ հաստատվել է ՀՀ հակակոռուպցիոն ռազմավարությունը եւ դրա իրականացման 2009—2012 թթ. միջոցառումների ծրագիր, որով լուրջ պարտավորություներ են դրվում ՀՀ իրավապահ մարմինների վրա»,–երեկ մամուլի ասուլիսում ասաց ՀՀ ոստիկանության կազմակերպված հանցավորության դեմ պայքարի գլխավոր վարչության պետ, ոստիկանության գնդապետ Հունան Պողոսյանը։
Կոռուպցիայի դեմ պայքարի գործում հիմնական ելակետ են ընդունվել ինչպես հիմնախնդրին առնչվող միջազգային փաստաթղթերում, այնպես էլ ներպետական օրենսդրական ակտերում ամրագրված դրույթները, ինչի արդյունքում նշված ոլորտում իրավապահ մարմինների աշխատանքները ձեռք են բերել առավել համակարգված բնույթ։
Կոռուպցիայի հաղթահարմանն ուղղված պատասխանատվության մեխանիզմների կիրառումը ենթադրում է իրավապահ մյուս պետական մարմինների համատեղ եւ ներդաշնակ աշխատանք՝ միտված մեկ ընդհանուր նպատակի՝ կոռուպցիոն երեւույթների հայտաբերմանը։
Հ. Պողոսյանը տեղեկացրեց, որ 2008թ. 392 կոռուպցիոն հանցագործության դեպքերի դիմաց նախորդ տարի բացահայտվել է 550 դեպք, որից 418—ը՝ ՀՀ ոստիկանության ուժերով։
Բացի այս ամենը, բացահայտվել է կեղծ փողեր պատրաստելու եւ իրացնելու 8 դեպք, նախորդ տարվա մեկի դիմաց. «Չնայած կեղծ դրամների գումարը չնչին է, սակայն այն հանգամանքը, որ գրանցված հանցագործությունների հիմնական մասը չի բացահայտվում, անհանգստանալու տեղիք է տալիս։ Այս ուղղությամբ աշխատանքները բարելավման լուրջ կարիք ունեն եւ գտնվում են ՀՀ ոստիկանապետի մշտական ուշադրության ներքո»։
Կոռուպցիոն եւ տնտեսական բնույթի հանցագործությունների դեմ պայքարի օպերատիվ եւ հետախուզական աշխատանքներին զուգընթաց՝ ոստիկանությունը աշխատանքներ է տանում համակարգում կոռուպցիոն ռիսկերը նվազեցնելու, ոստիկանության հանդեպ հասարակության հավատը եւ վստահությունը վերականգնելու ուղղությամբ։ Հակակոռուպցիոն ներքին միջոցառումներ են իրականացվում ոստիկանության գործունեության բոլոր ուղղություներով։ Հ. Պողոսյանը նշեց նաեւ, որ կոռուպցիայի դեմ պայքարի հիմնական գրավականներից է նաեւ իրավապահ մարմինների եւ քաղաքացիական հասարակության արդյունավետ փոխհամագործակցությունը։