Հայ ազգային կոնգրեսն ընդդեմ ԱՄՆ–ի կոնգրեսի՞

ԱՄՆ–ի ներկայացուցիչների պալատի արտաքին հարաբերությունների հանձնաժողովում հայոց ցեղասպանության բանաձեւի քննարկումից առաջ Հայաստանում գուշակների չհայտարարված մրցույթ էր։
Կասանդրաների ու Վանգաների կոչումների հավակնորդների առաջին շարքում Հայ ազգային կոնգրեսի թիմն էր։ Գուշակախաղի գագաթնակետը մարտիմեկյան հանրահավաքն էր, եւ, ինչպես պարզվեց ՀԱԿ–ի առաջնորդ Լեւոն Տեր–Պետրոսյանի ելույթից, ըստ ամենայնի, մինչ այդ նա հայ—թուրքական հարաբերությունների վերաբերյալ խորհրդատվություններ էր անցկացրել Թուրքիայի ԱԳ նախարար Ահմեդ Դավութօղլուի հետ։
Ահավասիկ. հանրահավաքում Տեր Պետրոսյանը թերահավատությամբ արտահայտվելով հայոց ցեղասպանության միջազգային ճանաչման շարունակականության վերաբերյալ, ասել էր. «Թուրքիան, ինչ որ ցանկանում էր ստանալ այդ արձանագրություններից, արդեն ստացել է Այն է՝ անշրջելիորեն կասեցրել է հայոց ցեղասպանության միջազգային ճանաչման գործընթացը»։ Կարծես ի պատասխան նրա եւ նրա հետ պայմանավորվածության համաձայն, Դավութօղլուն արդեն բանաձեւի ընդունումից հետո հայտարարել էր. «Ոչ ոք չի հայտարարում, որ դրանք (արձանագրությունները) փակուղի են մտել։ Երեկվա ԱՄՆ—ում կայացրած որոշումը ոչ թե դանդաղեցման, այլ կանգնեցման կետի բերեց»։ ՀԱԿ–ի ղեկավարը իր ելույթում ավելի է մոտենում իրեն ակամա «գործընկեր դարձած» Թուրքիայի ԱԳՆ ղեկավարի տեսակետին. Լ. Տեր–Պետրոսյան. «Ճնշումները չեն օգնի, քանի որ Թուրքիան, առնվազն «Ծոցի պատերազմից» ի վեր, ապացուցել է, որ ճնշումների չի ենթարկվում…», Ահմեդ Դավութօղլու. «Թուրքիան երբեք ճնշման տակ որոշում չի ընդունի։ Մենք ճնշումով որոշում չենք ընդունում»։
Ի դեպ. ՀԱԿ–ի մամուլի խոսնակ Արման Մուսինյանն իր ղեկավարից ավելի հոռետես էր, եւ մինչ Կոնգրեսի (խոսքն ԱՄՆ ի, այլ ոչ թե Հայ ազգային կոնգրեսի մասին է) ներկայացուցիչների պալատի արտաքին հարաբերությունների հանձնաժողովում քննարկումը հայտարարել էր, թե չի հավատում, որ հանձնաժողովը կընդունի հայոց ցեղասպանությունը ճանաչող թիվ 252 բանաձեւը։ Ըստ նրա՝ դժվար է հավատալ, որ ԱՄՆ—ն կզոհի իր անվտանգության, տնտեսության, աշխարհաքաղաքական, հատկապես Միջին Արեւելքում իր կենսական շահերը ցեղասպանության ճանաչման համար։
Այսքանից հետո ամենեւին էլ զարմանալի չի լինի, եթե մի օր էլ Հայ ազգային կոնգրեսը ի պատասխան ԱՄՆ–ի կոնգրեսի, համաձայնելով Դավութօղլուի հետ, հայտարարի. «1915—ին հայերի տարագրություն է եղել»…

06-03-2010