Հայաստանը ստանձնում է Բոլոնիայի գործընթացի քարտուղարությունը

Հայաստանը հուլիսի 1—ից պաշտոնապես կստանձնի Բոլոնիայի գործընթացին հետամուտ խմբի քարտուղարությունը։ Հայաստանն այդ կարեւորագույն պաշտոնը կստանձնի մինչեւ 2015 թ. հունիսի 30—ը, երբ Հայաստանում տեղի կունենա Բոլոնիայի անդամ երկրների նախարարների մասնակցությամբ խորհրդաժողով։ «Արմենպրեսի» փոխանցմամբ՝ ՀՀ կրթության եւ գիտության նախարարի տեղակալ Կարինե Հարությունյանը նշեց, որ այս նոր պարտականությունը Հայաստանի համար կլինի շատ պատասխանատու, միեւնույն ժամանակ նաեւ պատվաբեր։ «Սա աննախադեպ գործընթաց է, քանի որ նախկինում կրթական համակարգը այսպիսի գործառույթ երբեք չի ստանձնել»,— ասաց նա։ ԿԳ փոխնախարարը տեղեկացրեց, որ արդեն ձեւավորվել են քարտուղարության անձնակազմը, գրասենյակը։
Վերջին երկու տարիներին քարտուղարությունն իրականացրել է Ռումինիան, եւ Հայաստանը նշաձողի այդ բարձր մակարդակը անպայմանորեն կփորձի պահպանել։ «Սա անխոս կլինի Հայաստանի համար շատ մեծ փորձառություն եւ իհարկե մեծ խթան կհանդիսանա բարձրագույն կրթական համակարգի բարեփոխումների համար»,—ասաց նա։
ՀՀ—ում Եվրոպական միության պատվիրակության ղեկավար դեսպան Տրայան Հրիստեան շնորհավորեց Հայաստանի կառավարությանը՝ այս բարձր պաշտոնի համար։ «Սա իսկապես հայաստանյան կրթական համակարգի համար մեծ ձեռքբերում է։ Այն իսկապես կնպաստի եվրոպական կրթական ընդհանուր տարածքի ձեւավորմանը, շարժունակության բարձրացմանը»,— ասաց նա։
ՀՀ—ում Եվրոպայի խորհրդի գրասենյակի ղեկավար Սիլվիա Մարիա Զահեն շեշտեց, որ բարձրագույն կրթության ոլորտում Հայաստանը երկարամյա փորձ արդեն ունի, ինչպես նաեւ հասկանում է կրթության կարեւորությունը տնտեսության զարգացման համար։ 2015 թ. անցկացվելիք խորհրդաժողովի ընթացքում Հայաստան կժամանեն Բոլոնիայի գործընթացի անդամ 47 երկրների նախարարներ։

29-06-2012