Հայերեն / English / Русский

Հանրապետություն
Հասարակություն
Ներքին կյանք
Արտաքին քաղաքականություն
Տնտեսություն
Սոցիում
Մշակույթ
Գիտություն
Կրթություն
Առողջապահություն
 
Պաշտոնական
Նախագահ
Ազգային ժողով
Կառավարություն
ԱԳՆ
ՊՆ
Մայր Աթոռ
Այլք...
 
Երևան
Մարզեր
ԼՂՀ
Աշխարհ
Զանազան

20.09.2017
ԿԱՌԱՎԱՐՈՒԹՅՈՒՆ


Առաջարկների սպասելիս

Հանրապետությունում առկա է շուրջօրյա դեղատների ապահովման խնդիր

Երեկ տեղի է ունեցել ՀՀ կառավարության հերթական նիստը, որը վարել է ՀՀ վարչապետի պաշտոնակատար Կարեն Կարապետյանը, հայտնում են ՀՀ կառավարության տեղեկատվության եւ հասարակայնության հետ կապերի վարչությունից։ Նախքան օրակարգային հարցերի քննարկումը՝ վարչապետի պաշտոնակատարը մի շարք հանձնարարականներ է տվել։ Կարեն Կարապետյանը, անդրադառնալով հանրապետությունում բնակչության համար դեղերի հասանելիության բարելավմանը, նշել է. «Իրականացված ուսումնասիրությունների արդյունքում պարզ է դարձել, որ հանրապետության նույնիսկ խոշոր բնակավայրերում առկա է շուրջօրյա դեղատների ապահովման խնդիր։ Ստեղծված իրավիճակն անթույլատրելի է եւ առաջացնում է խնդիրներ թե՛ մեր համաքաղաքացիների եւ թե՛ զբոսաշրջիկների համար»։ Այդ նպատակով վարչապետի պաշտոնակատարը հանձնարարել է. ՀՀ առողջապահության նախարարին 1 ամսյա ժամկետում ուսումնասիրել ՀՀ բնակավայրերում 24 ժամ եւ առանց հանգստյան օրերի աշխատող դեղատների առկայությունն ապահովելու հնարավորությունները եւ կառավարության աշխատակազմ ներկայացնել առաջարկներ, այդ թվում՝ ըստ բնակավայրերի դրանց օպտիմալ բաշխվածության վերաբերյալ։ Կարեն Կարապետյանը հանձնարարել է բանակցել գործող դեղատնային ցանցերի կամ առանձին դեղատների հետ՝ հերթապահ դեղատների առկայությունը ՀՀ բնակավայրերում ապահովելու նպատակով եւ կառավարության աշխատակազմ ներկայացնել առաջարկներ հարցին լուծում տալու նպատակով։ «Իրականում բոլոր բնակավայրերին պետք է ուշադրություն դարձնել, բայց խնդիրն առավել ակնհայտ է տուրիստական գոտիներում։ Հատուկ ուշադրություն դարձրեք հատկապես զբոսաշրջության կենտրոններին»,–նշել է վարչապետի պաշտոնակատարը։

Առաջարկություններ կներկայացվեն

Անդրադառնալով տեխնիկական անվտանգության փորձաքննության ոլորտում առկա խնդիրներին՝ Կարեն Կարապետյանը նշել է. «Արտակարգ իրավիճակների նախարարություն իրականացրած իմ այցի ընթացքում վերհանվել են գործնական եւ օրենսդրական խնդիրներ տեխնիկական անվտանգության փորձաքննության իրականացման ոլորտում։ Նշված փորձաքննությունների ոչ պատշաճ իրականացման յուրաքանչյուր դեպք իրական վտանգ է ներկայացնում մեր համաքաղաքացիների անվտանգության եւ առողջության համար։ Այս խնդրին հարկավոր է տալ համակարգային լուծումներ, հատկապես, հստակեցնելով թե՛ փորձաքննություն իրականացնողի, թե՛ շահագործողի եւ այլ մասնակիցների հստակ պարտականությունների շրջանակը եւ պատասխանատվության խիստ մեխանիզմները»։ Վարչապետի պաշտոնակատարը հանձնարարել է ՀՀ արտակարգ իրավիճակների նախարարին՝ 1 ամսյա ժամկետում կառավարության աշխատակազմ ներկայացնել համալիր լուծման առաջարկություն՝ տեխնիկական անվտանգության ոչ պատշաճ փորձաքննության իրականացման համար պատասխանատվության հստակ միջոցների, դրանց կիրառման եւ խստացման վերաբերյալ՝ հաշվի առնելով համարժեք պատասխանատվության սկզբունքը։ Միաժամանակ նախարարությունը առաջարկություն կներկայացնի նաեւ նշված ոլորտի կարգավորումների բարեփոխման վերաբերյալ՝ մանրամասն ուսումնասիրելով հնարավոր այլընտրանքային մոտեցումները, ինչպես, օրինակ, ապահովագրական մեխանիզմների ներգրավման հնարավորությունը։

Պարապուրդի մատնված անշարժ գույքի խնդիրը

Վարչապետի պաշտոնակատար Կարեն Կարապետյանն անդրադարձել է նաեւ հանրապետությունում, այդ թվում՝ Սեւանա լճին հարակից տարածքներում եւ Երեւանի կենտրոնում գտնվող պարապուրդի մատնված անշարժ գույքի խնդրին։ Կարեն Կարապետյանը նշել է, որ Հայաստանի ողջ տարածքում առկա է մեծ քանակությամբ պարապուրդի մատնված գույք, չնայած այն հանգամանքին, որ դրանք ունեն բավականին լուրջ ներուժ՝ հավելյալ արժեք ստեղծելու համար։ Կարեն Կարապետյանը, դիմելով ՀՀ ֆինանսների նախարարի պաշտոնակատարին, հետաքրքրվել է, թե ինչ փուլում են այդ գույքի հաշվառումն ու ուսումնասիրությունը։ Վարդան Արամյանը որոշ մանրամասներ է ներկայացրել այդ ուղղությամբ տարվող աշխատանքների վերաբերյալ եւ նշել, որ ավելի ամբողջական տեղեկատվությունը կներկայացվի առաջիկայում։
Կառավարության ղեկավարի պաշտոնակատարն ընդգծել է, որ աշխատող բիզնեսը լրացուցիչ բեռ չպետք է ստանա, իսկ այն բիզնեսի նկատմամբ, որը չի աշխատում, պետք է կիրառել պրոգրեսիվ գույքահարկ։ «Աշխատող բիզնեսի մոտ պրոգրեսիվ գույքահարկը ջնջվում է, լրացուցիչ բեռ չի առաջանում, մյուսի մոտ առաջանում է։ Ինչ վերաբերում է Երեւանի կենտրոնին, ապա Երեւանի քաղաքապետարանը պետք է որոշի եւ, կարծում եմ, տրամաբանական ժամկետ սահմանի՝ նշելով, որ եթե գույքն աշխատեցնեն, ապա պրոգրեսիվ գույքահարկ չի կիրառվելու, հակառակ դեպքում՝ կիրառվելու է։ Դա պետք է լինի կանխատեսելի, եւ այնպես չստացվի, թե մենք բիզնեսի համար պայմանը փոխում ենք՝ առանց իրեն զգուշացնելու»,–ասել է Կարեն Կարապետյանը։
Վարչապետի պաշտոնակատարը նաեւ շնորհավորել է Երեւանի քաղաքապետ Տարոն Մարգարյանին՝ մաղթելով նորանոր հաջողություններ. «Ամեն ինչով սատարելու ենք, որպեսզի Երեւանը դառնա ավելի լավը»։

Առավել բարենպաստ պայմաններ

Հայաստանում մեկնարկած մինչեւ 9 տոկոս տոկոսադրույքի 7 տոկոսային կետի սուբսիդավորմամբ տրամադրվող գյուղատնտեսական տեխնիկայի ֆինանսական վարձակալության՝ լիզինգի պետական աջակցության ծրագիրը մեծ հետաքրքրություն է առաջացրել տնտեսավարողների շրջանում։ Միաժամանակ, վերջիններս պատրաստակամություն են հայտնել ձեռք բերել այլ գյուղատնտեսական տեխնիկայի տեսականի, որի տրամադրումը ծրագրի շրջանակում հնարավոր չէ՝ ծրագրում գյուղատնտեսական տեխնիկայի տեսականու գծով առկա սահմանափակման պատճառով։ Մինչդեռ, մշակելի հողակտորների ներկայիս կտրտվածությունը, չափերը եւ մշակաբույսերի բազմազանությունը պահանջում են նաեւ հավաքակազմի տեխնիկական միջոցների տեսակների փոփոխություն եւ առավել լայն տեսականի։ Գործադիրը լրացում եւ փոփոխություններ է կատարել նախկինում ընդունած որոշումներից մեկում՝ լիզինգի պետական աջակցության ծրագրի շրջանակում գյուղատնտեսությունում տնտեսավարողների կողմից ձեռք բերվող գյուղատնտեսական տեխնիկայի տեսականու գծով առկա սահմանափակումը վերացնելու նպատակահարմարությամբ պայմանավորված։ Արդյունքում կստեղծվեն առավել բարենպաստ պայմաններ գյուղացիական տնտեսությունների կողմից ապրանքային արտադրության կազմակերպման եւ հետագա զարգացման համար։
Գործադիրը հաստատել է գյուղատնտեսական տեխնիկայի կայանի կազմակերպման նպատակով «Իդաս» ՍՊԸ–ի կողմից ներկայացված եւ դրական եզրակացություն ստացած առաջարկը։ Արդյունքում կստեղծվի գյուղատնտեսական տեխնիկայի կայան, որի միջոցով որակյալ ծառայություններ կմատուցվեն գյուղացիական տնտեսություններին։ Վերջինս կնպաստի գյուղատնտեսական աշխատանքների մեքենայացման մակարդակի, ագրարային ոլորտի արդյունավետության բարձրացմանը, գյուղատնտեսական արտադրանքի արտադրության ծավալների աճին։ Մեկ այլ որոշմամբ էլ 700 մլն ՀՀ դրամ կհատկացվի գյուղատնտեսական տեխնիկայի կայանների գործունեության կազմակերպման եւ զարգացման նպատակով։

Կառուցվածքային փոփոխություններ ՊԵԿ–ում

ՀՀ ԿԱ պետական եկամուտների կոմիտեում ներկայումս նախատեսվում է կատարել կառուցվածքային փոփոխություններ, որոնք նպատակաուղղված են հարկային վարչարարության կատարելագործմանը, կոմիտեի համակարգի ռեսուրսների առավել արդյունավետ օգտագործմանը, կոռուպցիոն ռիսկերի նվազեցմանը, կոմիտեի գործառույթների առավել լիարժեք եւ նպատակային իրականացմանը։ Այդ նպատակով կառավարությունը փոփոխություններ է կատարել նախկինում ընդունած որոշումներից մեկում՝ կոմիտեի կանոնադրության մեջ եւ աշխատակազմի կառուցվածքում։ Մասնավորապես՝ նախատեսվում է լուծարել հարկային (տարածքային) տեսչությունները՝ վերջիններիս փոխարեն ստեղծելով թվով 3 վարչություններ, եւ դրանք ներառել կոմիտեի աշխատակազմի կառուցվածքային ստորաբաժանումների կազմում՝ որպես վերադաս հարկային մարմնի ստորաբաժանումներ։ Կառուցվածքային փոփոխությունների արդյունքում նախատեսվում է նաեւ կրճատել մաքսատների թվաքանակը եւ դրանք՝ որպես վերադաս մաքսային մարմնի վարչություններ, նախատեսել կոմիտեի աշխատակազմի կառուցվածքում։ ՀՀ օրենսդրությամբ սահմանված կարգով վերոնշյալ գործընթացի արդյունքում նախատեսվում է շուրջ 483 հաստիքների կրճատում։ Կոմիտեի կառուցվածքային ստորաբաժանումներից նախատեսվում է լուծարել ակցիզային դրոշմանիշերի եւ դրոշմապիտակների հաշվառման բաժինը՝ հաշվի առնելով այն հանգամանքը, որ վերջինիս գործառույթներն իրականացվելու են ստեղծվելիք Հարկ վճարողների սպասարկման վարչության, Փոքր հարկ վճարողների, ինչպես նաեւ Խոշոր եւ միջին հարկ վճարողների տեսչություն–վարչությունների կողմից։ Միաժամանակ նախատեսվում է կոմիտեի աշխատակազմում ստեղծել Ոչ առեւտրային կազմակերպությունների հսկողության բաժին։
Կառավարությունը սահմանել է Լուծարման (պետական հաշվառումից հանման) ենթակա հարկ վճարողների ցանկերը եւ ցանկերում ներառված հարկ վճարողների՝ հարկային մարմնի կողմից վերահսկվող պարտավորությունների բացակայության մասին տեղեկանքը ՀՀ արդարադատության նախարարության աշխատակազմի իրավաբանական անձանց պետական ռեգիստրի գործակալություն ներկայացնելու կարգը։ Որոշման նպատակը «Հարկային հաշվետվություններ չներկայացրած կազմակերպությունները լուծարելու եւ անհատ ձեռնարկատերերին պետական հաշվառումից հանելու մասին» ՀՀ օրենքի սահմանած պահանջներն ապահովելն է։ Ներկայումս հարկային մարմնում հաշվառված են բազմաթիվ կազմակերպություններ եւ անհատ ձեռնարկատերեր, որոնք չեն գործում, սակայն պետական գրանցումից դուրս չեն եկել։ Այդ իսկ պատճառով հարկային մարմնի եւ ՀՀ ԱՆ պետական ռեգիստրի գործակալության տեղեկատվական բազաներն ուռճացած են, ինչն էլ դժվարացնում է էլեկտրոնային համակարգերի աշխատանքները։ Ըստ այդմ՝ անհրաժեշտություն է առաջացել լուծարել (պետական հաշվառումից հանել) փաստացի չգործող հարկ վճարողներին։
Կառավարությունը հաստատել է էլեկտրոնային աճուրդի իրականացման կարգը եւ էլեկտրոնային աճուրդի միջոցով ձեռք բերվող ապրանքների, աշխատանքների եւ ծառայությունների ցուցակը։ Որոշմամբ կսահմանվեն էլեկտրոնային աճուրդների իրականացումն ապահովող համակարգը, պատվիրատուների եւ մասնակիցների՝ նշված համակարգում գրանցման կարգը, էլեկտրոնային աճուրդով գնումների կատարման առանձնահատկությունները, էլեկտրոնային աճուրդի միջոցով ձեռք բերվող ապրանքների, աշխատանքների եւ ծառայությունների ցուցակը։

Աջակցություն՝ հերթական ներդրումային ծրագրերին

Կառավարության որոշմամբ «Սահլեւս» ՍՊԸ կօգտվի գերակա ոլորտում իրականացվող ներդրումային ծրագրի շրջանակում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը եւ նյութերը ներմուծման մաքսատուրքից ազատելու արտոնությունից։ Ընկերությունը ներմուծվող սարքավորումն օգտագործելու է կրակայրիչների արտադրության համար։ Ծրագրով նախատեսված արտադրանքի ծավալները կկազմեն 230 մլն ՀՀ դրամ, որից 130 մլն ՀՀ դրամն իրացվելու է ՀՀ տարածքում, 80 մլն ՀՀ դրամը՝ ԵԱՏՄ երկրներում, 20 մլն ՀՀ դրամը՝ երրորդ երկրներում։ Նախատեսվում է ստեղծել 30 նոր աշխատատեղ. աշխատելու են նաեւ կանանց գաղութի դատապարտյալները։ Արտոնություն ստանալու համար ներկայացված սարքավորումների եւ հումքի արժեքը կազմում է 170 000 000 ՀՀ դրամ։
Նույն արտոնությունից կօգտվի նաեւ «Ֆարմատեք» ՓԲԸ—ն, որը հումքն օգտագործելու է դեղագործության ոլորտում։ Ծրագրով նախատեսված արտադրանքի ծավալները կկազմեն 2 մլրդ 800 մլն ՀՀ դրամ։ Նախատեսվում է իրականացնել 900 մլն ՀՀ դրամի ներդրում, ստեղծել 9–10 նոր աշխատատեղ՝ 160 000 ՀՀ դրամ միջին աշխատավարձով։
Կառավարության մեկ այլ որոշմամբ ներդրումային ծրագրի շրջանակում «Գրին Փաուր» ՍՊԸ–ի կողմից ապրանքների ներմուծման դեպքում ավելացված արժեքի հարկի գումարների վճարման ժամկետը կհետաձգվի երեք տարով։ Ընկերության նպատակն է ՀՀ, Սյունիքի մարզում Մեղրի համայնքում կառուցել 3,5 ՄգՎտ փոքր հիդրոէներգոկասկադ, որը նախատեսում է կատարել ընդհանուր շուրջ 1 մլրդ ՀՀ դրամի ներդրում, որից սարքավորումների համար նախատեսված գումարը կկազմի մոտ 311,4 մլն ՀՀ դրամ։
Արդյունքում կստեղծվի մոտ 13 աշխատատեղ՝ 82 հազար ՀՀ դրամ միջին աշխատավարձով։

Օրենսդրական նախաձեռնություններ

Գործադիրի հավանությանն է արժանացել «Հայաստանի Հանրապետության եւ Ռուսաստանի Դաշնության միջեւ միջպետական (միջկառավարական) համաձայնագրերի շրջանակներում ՀՀ զինված ուժերի համար բացառապես ռազմական նշանակության արտադրանքի ներմուծումն ավելացված արժեքի հարկից ազատելու մասին» ՀՀ օրենքի նախագիծը։ Օրինագծի ընդունման արդյունքում կստեղծվի համապատասխան իրավական դաշտ։
Կառավարությունը հավանություն է տվել «ՀՀ վարչատարածքային բաժանման մասին» ՀՀ օրենքում փոփոխություններ եւ լրացումներ կատարելու մասին», «Տեղական ինքնակառավարման մասին» ՀՀ օրենքում փոփոխություններ եւ լրացումներ կատարելու մասին» ՀՀ օրենքների նախագծերի փաթեթին։ Ըստ այդմ՝ նախատեսվում է իրականացնել համայնքների խոշորացման 30 ծրագիր՝ ՀՀ Արագածոտնի մարզի Ապարան, Ալագյազ, Արագածավան, Ծաղկահովիտ, ՀՀ Գեղարքունիքի մարզի Ճամբարակ, Վարդենիս, Մասրիկ, ՀՀ Լոռու մարզի Ալավերդի, Ախթալա, Ստեփանավան, Տաշիր, Օձուն, ՀՀ Կոտայքի մարզի Բյուրեղավան, Եղվարդ, Չարենցավան, Ակունք, Մեղրաձոր, Քասախ, Ջրվեժ, ՀՀ Շիրակի մարզի Անի, Ախուրյան, Մարմաշեն, ՀՀ Սյունիքի մարզի Կապան, Սիսիան, Քաջարան, ՀՀ Վայոց ձորի մարզի Եղեգնաձոր, Արենի, Եղեգիս, ՀՀ Տավուշի մարզի Իջեւան, Բերդ համայնքային փնջերում։ «Տեղական ինքնակառավարման մասին» ՀՀ օրենքում փոփոխություններ կատարելու նպատակն է՝ տալ օրենքով միավորվող համայնքների տեղական ինքնակառավարման մարմինների լիազորությունները դադարեցնելու եւ միավորված համայնքի տեղական ինքնակառավարման մարմինների լիազորությունների ստանձնման ժամկետների վերաբերյալ իրավակարգավորումներ, ինչպես նաեւ տեխնիկական եւ ընթացակարգային բնույթի փոփոխություններ եւ լրացումներ կատարելը։
Գործադիրը հավանություն է տվել «ՀՀ հողային օրենսգրքում լրացումներ կատարելու մասին» եւ հարակից մի շարք օրենքներում փոփոխություններ եւ լրացումներ կատարելու մասին ՀՀ օրենքների նախագծերի փաթեթին։ Փաթեթի ընդունման արդյունքում կկարգավորվի ՀՀ քաղաքացի հանդիսացող եւ քաղաքացիությունը դադարեցված կամ հատուկ կացության կարգավիճակ ունեցող եւ այդ կարգավիճակը դադարեցված անձանց սեփականության իրավունքով պատկանող գյուղատնտեսական նշանակության հողերի հետագա ճակատագիրը։ Մասնավորապես, կնախատեսվի վերոնշյալ անձանց կարգավիճակը դադարելուց հետո գյուղատնտեսական նշանակության հողերն օտարելու պարտավորությունը եւ սահմանված ժամկետում ու կարգով օրենքով նախատեսված պարտավորությունը չկատարելու իրավական հետեւանքները։
Հավանության է արժանացել «ՀՀ քաղաքացիական օրենսգրքում լրացում կատարելու մասին», «Գույքի նկատմամբ իրավունքների պետական գրանցման մասին» ՀՀ օրենքում լրացում կատարելու մասին» ՀՀ օրենքների նախագծերի փաթեթը։ Օրինագծերի նպատակը ՀՀ քաղաքացիական օրենսգրքում հարեւանային իրավունքի ներդրումն է, ինչն էլ կարգավորելու է ազդեցություն առաջացնող հողամասերի կամ այլ անշարժ գույքի նկատմամբ սեփականության իրավունք ունեցող անձանց միջեւ ծագած հարաբերությունները, սահմանելու է, թե որ հողամասերն են «հարեւանային», ինչ պարտականություններ ունեն հարեւանները միմյանց նկատմամբ եւ այլն։ Նախագծով առաջարկվում է օրենսդրորեն ամրագրել հարեւանների կողմից հարգանք ցուցաբերելու պարտականությունը, որի պարագայում հարեւանը պարտավորվում է հանդուրժել հարեւան անշարժ գույքից իր սեփականություն ներթափանցող ազդեցությունը, որը չի խոչընդոտում իր անշարժ գույքի օգտագործումը, կամ այդ ազդեցությունը պայմանավորված է գույքի՝ տվյալ տարածքին բնորոշ ձեւով բնականոն օգտագործմամբ կամ այդպիսի ազդեցությունն աննշան է։
Գործադիրը հավանություն է տվել «Կուտակային կենսաթոշակների մասին» եւ հարակից օրենքներում փոփոխություններ եւ լրացումներ կատարելու մասին ՀՀ օրենքների նախագծերի փաթեթին, որի նպատակն է բարձրացնել լիազոր մարմնի գործառույթների իրականացման օպերատիվությունը։ Ներկայացվող նախագծերն ընդունվելու դեպքում կապահովվի միջազգային ծառայողի կենսաթոշակի իրավունքի իրացումը՝ ՀՀ օրենսդրության համաձայն կենսաթոշակի իրավունքի իրացման համար միջազգային կառույցի բյուջեի միջոցների հաշվին կատարված մասհանումների հիման վրա։ Նախագծերով առաջարկվող իրավակարգավորումների կիրարկման տեսանկյունից առանցքային նշանակություն ունի միջազգային կազմակերպությունից ստացված՝ անձնավորված տվյալներն անձնավորված հաշվառման տեղեկատվական համակարգ ներառելու ընթացակարգի խնդրի լուծումը։ Նախագծով առաջարկվում է անձնավորված տվյալները տեղեկատվական բազա ներառել պետական մարմնի միջոցով՝ ՀՀ կառավարության սահմանած կարգով։

Կլուծվեն ՀՀ մարզերի առաջնահերթ հիմնախնդիրները

Կառավարության որոշմամբ ՀՀ մարզերում հրատապ լուծում պահանջող հիմնախնդիրների լուծման նպատակով ՀՀ մարզպետարաններին կհատկացվի շուրջ 1,988,576.9 հազար ՀՀ դրամ՝ մարզային եւ համայնքային ենթակայության ենթակառուցվածքներում, ինչպես նաեւ բնակչության համար սոցիալական եւ կենսական նշանակություն ունեցող ծրագրեր իրականացնելու համար։ Մասնավորապես կիրականացվեն դպրոցաշինության, նախադպրոցական հաստատության, բնակարանաշինության, ճանապարհաշինության, ջրամատակարարման, ոռոգման եւ այլ ոլորտներում կապիտալ եւ սոցիալական բնույթի ծրագրեր։

Բարենպաստ եւ առողջ միջավայր՝ տարեցների համար

Կառավարությունը հավանություն է տվել ծերացման հետեւանքների հաղթահարման եւ տարեցների սոցիալական պաշտպանության ռազմավարությանը եւ դրա իրականացման 2017–2021թթ. միջոցառումների ծրագրին։ Ռազմավարության նպատակն է ստեղծել բարենպաստ եւ առողջ միջավայր տարեց մարդկանց համար՝ ապահովելով նրանց ակտիվ ու արժանապատիվ ծերացման գործընթացը։ Ըստ ՀՀ ազգային վիճակագրական ծառայության տվյալների, 63 տարեկան եւ բարձր տարիքի մարդկանց թիվը կազմում է մշտական բնակչության ընդհանուր թվի 12.9 տոկոսը (387 659 մարդ)։ Ոլորտում դեռեւս կան լուծում պահանջող խնդիրներ, չնայած վերջին տարիներին իրականացվել են դրան ուղղված ծրագրեր։ Ռազմավարությամբ նախատեսվում է ուղենշել ոլորտի գերակայությունները, եւ առաջիկա 5 տարվա ընթացքում բարեփոխել հանրապետությունում տարեցների սոցիալական պաշտպանության համակարգը՝ ընդլայնելով տարեցներին ու հաշմանդամներին տրամադրվող սոցիալական ծառայությունների շրջանակը, ներդնելով ծառայությունների տրամադրման նոր մոդելներ եւ մոտեցումներ։
Գործադիրն հաստատել է առողջապահության նախարարության «Հայաստանում տուբերկուլոզի դեմ պայքարի, մոր եւ մանկան առողջության եւ ընտանիքի պլանավորման/վերարտադրողական առողջության բարելավում» դրամաշնորհային ծրագրի արտաբյուջետային հաշվի միջոցների ծախսման 2017թ. նախահաշիվը։ ԱՄՆ կառավարության աջակցությամբ իրականացվող ծրագրի նպատակն է նվազեցնել տուբերկուլոզի բեռը, մայրական ու մանկական հիվանդացության եւ մահացության մակարդակը Հայաստանում։

19-05-2017





 
20-09-2017
Ճանաչումն ԱՄՆ—ի շահերից է բխում
Ուստի կոնգրեսականներն աշխատում են ցեղասպանության ճանաչման ուղղությամբ

Հայկական ...


20-09-2017
Ներդրումները միայն Հայաստանի 3 միլիոնանոց շուկա չեն մտնում
Թեմատիկ քննարկման ժամանակ վարչապետը նաեւ հարցերի պատասխանեց

Տնտեսության ...


 
20-09-2017
Զինված ուժերում ծառայելը մեր բարոյական եւ իրավական պարտականությունն է
Հայաստան—սփյուռք 6—րդ համաժողովի շրջանակներում ՀՀ պաշտպանության նախարարության կողմից կազմակերպվել ...


 
20-09-2017
Կարեւոր է, որ բանակը սիրված է ժողովրդի կողմից
Չիլիի ռազմածովային ուժերի ծովակալ Հերնան Կույումջյանը արդեն երրորդ անգամ ...


 
20-09-2017
Զիջումները՝ միայն ԼՂՀ ճանաչման դեպքում
Փոխզիջումային քաղաքականությանը պետք է շատ խնամքով մոտենալ

Հայաստան—սփյուռք ...


20-09-2017
Նոր ուղղություններ՝ գյուղոլորտում
ՀՀ գյուղատնտեսության նախարարն այցելել է Կոտայքի մարզ

ՀՀ ...


 
20-09-2017
Արտադրել եւ դուրս գալ արտաքին շուկա
Քննարկվեցին ՀՀ տնտեսության զարգացման հեռանկարները

Հայաստան—սփյուռք 6—րդ համաժողովի ...



20-09-2017
Հայ լինելը Թուրքիայում դժվար է
Սակայն անձայն մնալը սխալ է, ...

 
20-09-2017
Բացվել է Արենու քարանձավ հնավայրը
ԱՄՆ—ն աջակցում է հուշարձանի ...

20-09-2017
Վարչապետն ԱՄՆ կոնգրեսականների հետ քննարկել է հայ–ամերիկյան տնտեսական համագործակցության հեռանկարները
Վարչապետ Կարեն Կարապետյանը երեկ ընդունել է ...

20-09-2017
Միասին շարունակենք կառուցել բոլորիս երազած երկիրը
Վարչապետի ելույթը՝ Հայաստան–սփյուռք ...
USD
EURO
RUR
GEL
Եղանակը Երևանում
գիշերը +16... +18
ցերեկը +32... +34

Մեր մասին
Կապ
   Արխիվ

© 2006 Copyright Hayastany Hanrapetutyun daily © 2006 Design and development by WEBMAKER STUDIO