Հանրապետություն
Հասարակություն
Ներքին կյանք
Արտաքին քաղաքականություն
Տնտեսություն
Սոցիում
Մշակույթ
Գիտություն
Կրթություն
Առողջապահություն
 
Պաշտոնական
Նախագահ
Ազգային ժողով
Կառավարություն
ԱԳՆ
ՊՆ
Մայր Աթոռ
Այլք...
 
Երևան
Մարզեր
ԼՂՀ
Աշխարհ
Զանազան

23.10.2018
ԿԱՌԱՎԱՐՈՒԹՅՈՒՆ


Առավել արդյունավետ, առավել օրինական

Ավելի մեծ ծառայություն Հայաստանի Հանրապետությանը եւ նրա ժողովրդին

Վարչապետ Նիկոլ Փաշինյանը ներկա է գտնվել ՀՀ ոստիկանության կոլեգիայի նիստի բացմանը, որում քննարկել են 2018 թվականի առաջին կիսամյակին ոստիկանության ստորաբաժանումների կողմից իրականացված օպերատիվ ծառայողական գործունեությանն վերաբերղ հարցեր, հայտնում են ՀՀ կառավարության  տեղեկատվության եւ հասարակայնության հետ կապերի վարչությունից։ Իր խոսքում վարչապետը, մասնավորապես, անդրադարձել է համակարգի առջեւ դրված խնդիրներին եւ դրանց լուծման հնարավորություններին։
«Այս հանդիպումը լավ առիթ է, որպեսզի քննարկենք 2018 թվականի առաջին կիսամյակն իր ամբողջության մեջ, հետագա անելիքները եւ ոստիկանության գործունեության առանձնահատկություններն ընթացիկ իրավիճակում։ Հասկանալի է, որ այն, ինչ տեղի է ունեցել ՀՀ–ում, նկատի ունեմ քաղաքական փոփոխությունները, դրանք իրավիճակի լուրջ փոփոխություն են բոլորիս՝ ե՛ւ հանրության, ե՛ւ պետական մարմինների, ե՛ւ իշխանության ներկայացուցիչների համար։ Կառավարման համակարգում կան պայմանականորեն ասած նախկինում նշանակված, նոր նշանակված մարդիկ, որոնք իրենց քաղաքական կամ կադրային ծագումնաբանությամբ տարբեր ճանապարհ են անցել, եւ հասկանալի է, որ մենք անխուսափելիորեն պետք է մտնեինք ադապտացիայի շրջան, որը որոշակի ժամանակ պետք է ունենա։ Որքան մեծ է պետական տվյալ մարմինը, այնքան ավելի դժվար եւ երկար է տեղի ունենում այդ շրջանը, բայց հույս ունեմ, որ այսօրվա մեր քննարկման ֆորմալ արձանագրումներից մեկը կլինի այն, որ մենք նոր իրավիճակում արդեն ավարտել ենք ադապտացիայի այդ շրջանը եւ պատրաստ ենք լիարժեք գործել»,–ասել է Նիկոլ Փաշինյանը։
Կառավարության ղեկավարի խոսքով՝ ՀՀ վարչապետի պաշտոնը ստանձնելու հենց առաջին օրը հղած իր քաղաքական ուղերձները շարունակում են մնալ նույնը։ «Կարծում եմ՝ պարոն Օսիպյանը կհաստատի, որ մեր աշխատանքային քննարկումների ոգին եւ բովանդակությունը նույնիսկ մեկ միլիմետրով չեն տարբերվում այն բովանդակությունից, որ գոյություն ունի հրապարակային։ Սա շատ կարեւոր է, որպեսզի մենք արձանագրենք ոստիկանության գործունեությունը՝ որպես վարչապետին ենթակա մարմին։ Հայաստանում օրինականության հաստատումը կատարյալ առաջնահերթություն է բոլորիս համար, եւ Հայաստանում օրինականության հաստատման կարեւորագույն օղակներից մեկը ոստիկանությունն է։ Այստեղ պետք է հստակ գիտակցենք, որ հանցավորության դեմ պայքարում նույնպես առաջամարտիկը պետք է լինի ոստիկանությունը։ Վերջինիս գործունեության արդյունքում պետք է հստակ արձանագրենք քրեածին իրավիճակի էական եւ տեսանելի փոփոխություն ՀՀ–ում, որին հասնելու համար պետք է համոզված լինենք, որ ոստիկանությունում ղեկավար կազմը հստակ գիտակցում է իր անելիքը եւ պրոֆեսիոնալ կերպով պատրաստ է իրագործել այդ գործառույթը»,–նշել է վարչապետը։
Հաջորդ կարեւորագույն խնդիրը, որ Նիկոլ Փաշինյանը դրել է ոստիկանության առաջ՝ կազմակերպված հանցավորության եւ այս համատեքստում կոռուպցիայի, նման երեւույթների ու չարաշահումների դեմ պայքարն է։ «Կարող եմ ուրախությամբ նշել՝ վերջին օրերին ստանում եմ տեղեկություններ, որոնք հիմք են տալիս ասելու, որ ոստիկանության գործունեության արդյունավետությունն այս ուղղությամբ սկսում է էական փոփոխություններ ունենալ, ինչն, անկեղծ ասեմ, ինձ շատ է ուրախացնում։ Կրկին ասում եմ, որ խոսքն ամենեւին չի կարող եւ չպետք է լինի այսպես կոչված «վհուկների որսի» մասին, կարծում եմ՝ բոլորս հասկանում ենք, որ խոսքն անգամ չի կարող լինել քաղաքական հետապնդումների, Հայաստանում նոր քաղբանտարկյալներ ունենալու, կասկածելի քրեական գործեր ունենալու, անձնական մոտիվացիաներով մարդկանց հետապնդումների ենթարկելու մասին։ Ընդ որում, ես խոսում եմ բոլոր մակարդակներում, այսինքն՝ անձնական մոտիվացիան այնպես չէ, որ կարող է գալ միայն երկրի առաջին դեմքից, տեսականորեն՝ ոստիկանության պետը կարող է ունենալ անձնական մոտիվացիաներ, ռեգիոնալի պետը կարող է ունենալ անձնական մոտիվացիաներ, բաժնի եւ բաժանմունքի պետը կարող են ունենալ անձնական մոտիվացիաներ։ Մենք պետք է գործունեության այս տեսակն ընդհանրապես բացառենք եւ ոստիկանության գործունեությունը համապատասխանեցնենք ՀՀ օրենսսդրությանը»,–ասել է կառավարության ղեկավարը՝ հավելելով, որ Հայաստանում կա երկու զուգահեռ իրականություն. մի իրականությունն այն է, ինչ նկարագրված է Սահմանադրության եւ օրենքների մեջ, իսկ մի իրականությունն այն է, որ գոյություն ունի անկախ Սահմանադրությունից եւ օրենքներից։ «Մեր խնդիրն այս երկու իրականությունները նույնականացնելն է, այսինքն՝ իրականությունը համապատասխանեցնելն այն կարգավորումներին, որոնք տրված են ՀՀ օրենսդրությամբ։ Իհարկե, գիտենք, որ երբեմն օրենսդրության որակն այնպիսին է, որ նույնականացումը լիարժեք հնարավոր չէ իրականացնել՝ վատ որակի օրենքների պատճառով, բայց քանի դեռ դրանք գործում են որպես օրենք, ուրեմն դրանք օրենք են, եւ եթե բոլորս գալիս ենք այն համոզման, որ դրանք վատ օրենքներ են՝ ուրեմն պետք է աշխատենք դրանց լավացման ուղղությամբ»,–նշել է Նիկոլ Փաշինյանը։
Վարչապետի բարձրացրած հաջորդ խնդիրը վերաբերել է հասարակական կարգի եւ անվտանգության պահպանմանն ու ապահովմանը։ Գործադիրի ղեկավարն ընդգծել է, որ այս առումով մեծ խնդիրներ չկան եւ չպետք է լինեն, որովհետեւ Հայաստանում տեղի ունեցած ժողովրդական ոչ բռնի փոփոխություններից հետո նաեւ հաստատվել է համապատասխան մթնոլորտ։ «Ոստիկանության խնդիրն է նաեւ սիրո եւ համերաշխության մթնոլորտը պահպանելը, բայց դա չի նշանակում, որ ոստիկանությունը որեւէ օրինախախտման նկատմամբ պետք է լինի փափուկ, որովհետեւ օրինախախտումները սիրո եւ համերաշխության մթնոլորտի թիվ մեկ թշնամին են. որեւէ մեկի արտոնյալության կարգավիճակից է խաթարվում սիրո եւ համերաշխության մթնոլորտը։ Այս առումով, ցավոք, ազդակներ եմ ստանում, որ շատ դեպքերում այո՛, մարդիկ նկատում են, որ օրինակ՝ ճանապարհային ոստիկանության գործելակերպն էականորեն փոխվել է, բայց նաեւ որոշ դեպքերում, ցավոք, ահազանգ եմ ստանում, որ երբեմն ճանապարհային ոստիկանությունն այնքան փափուկ է օրինախախտների նկատմամբ, որ դա քաղաքացիների շրջանում դժգոհություն է առաջացնում։ Ցավոք, Հայաստանում Խորհրդային Միության փլուզումից եւ անկախության հաստատումից հետո ժողովրդավարություն եւ ամենաթողություն բառերը շատ դեպքերում հանրային գիտակցության մեջ հավասարվել են իրար։ Բայց ես ուզում եմ ասել, որ ամենաուժեղ իրավակարգերը եւ օրենքի նկատմամբ ամենախիստ պահանջները դրվում են ժողովրդավարական հասարակությունների մեջ։ Այսինքն, ժողովրդավարական հասարակությունը հիմնված է իրավունքի գերակայության, օրենքի գերակայության վրա։ Եվ եթե մենք օրինախախտումների նկատմամբ չափազանց խիստ մոտեցումներ չենք ցուցաբերում՝ դա ժողովրդավարության առաջին հակոտնյան է։ Մյուս կողմից, այս խնդիրը մենք պետք է լուծենք նաեւ մարդու իրավունքների պաշտպանությամբ եւ գործենք որոշակի սահմանափակումների շրջանակներում»,–ասել է Նիկոլ Փաշինյանը։
Կրկին անդրադառնալով ադապտացիայի շրջանին՝ վարչապետը նկատել է, որ անխուսափելիորեն լինելու են մարդիկ, որոնք անցնելու են այն, այսինքն՝ հարմարվելու են նոր պայմաններին, ոգեւորված են լինելու այն հնարավորություններից, որ այսօր բացվել են։ «Իհարկե, բազմաթիվ հնարավորություններ էլ փակվել են եւ պետք է փակվեն։ Բայց այս շրջանում յուրաքանչյուրը պետք է ունենա այս շրջանը բարեհաջող անցնելու հնարավորություն, եթե դրա համար չկան շատ լուրջ պատճառներ, որոնք բացառում են այդ հնարավորությունը։ Չեն կարող լինել այնպիսի քայլեր, որոնք խորթ են Հայաստանում տեղի ունեցած քաղաքական փոփոխությունների գաղափարախոսությանը, կամ այնպես, որ տեղի ունեցած փոփոխություններն աշխատեն քաղաքացիների մի խմբի օգտին եւ մի խմբի դեմ։ Մեր գործողությունների հիմքում այսպիսի գաղափարախոսություն չկա, չի եղել եւ եթե լիներ՝ կարծում եմ այս փոփոխությունները տեղի չէին ունենա։ Սա ամենակարեւոր խնդիրն է։ Մեր նպատակն է՝ համախմբել հանրության լավագույն ներուժը, հանրային կյանքը դարձնել առավել ներառական, որպեսզի կարողանանք իսկապես մեր երկրին զարգացման նոր ուժ, նոր խթան, նոր ոգեւորություն, նոր էներգիա հաղորդել։ Հայաստանում ձեւավորված էներգիայի մի մասը, իր չափաբաժինը պետք է ստանա նաեւ ՀՀ ոստիկանությունը։ Այս ողջ գործընթացի ընթացքում անընդհատ, հենց առաջին օրից փորձել ենք այսպես ասած պայմանական բարիկադները քանդել, եւ կարծում եմ, որ այսօրվա մեր զրույցն ապացույցն է նրա, որ այդ բարիկադները քանդված են։ Կոչ եմ անում ձեզ, որպեսզի յուրաքանչյուր ոստիկան օգտվի այդ հնարավորությունից, դրանից որեւէ մեկը զրկված չէ, եւ այդ հնարավորությունից օգտվելը նշանակում է անառարկելիորեն ծառայել օրենքին, իրավունքին, իրավակարգին»,–ասել է վարչապետը՝ անհրաժեշտ համարելով քննարկել նաեւ ողջ պետական համակարգի, այդ թվում՝ ոստիկանության արդյունավետության բարձրացման հարցերը։ «Հնարավոր են եւ մեծ հավանականությամբ տեղի են ունենալու որոշակի կառուցվածքային փոփոխություններ, որոնց նպատակը լինելու է հենց իմ ասած խնդիրների լուծման առավել արդյունավետ լինելը։ Այդ ողջ ընթացքում բացառվելու է «մերոնց եւ ձերոնց» բաժանելու գործընթացը։ Տեղի ունեցած փոփոխությունների առանցքային նպատակը եղել է եւ կա Հայաստանում բաժանարար գծերը վերացնելը։ Հայաստանում քաղաքական մակարդակում բաժանարար գծերը վերացված են, եւ իսկապես լիարժեք պետք է համախմբումը կարողանանք ապահովել»,–ընդգծել է Նիկոլ Փաշինյանը՝ հավելելով, որ քաղաքական փոփոխությունների արդյունքում ամեն ինչ արվել է, որ ոստիկանության համակարգի կայունությունը չխաթարվի։ «Մենք՝ կոնկրետ ես, չեմ կատարել քայլեր, չնայած դրանք լիարժեք իմ լիազորությունների շրջանակում են, որ համակարգի կայունությունը խաթարվի։ Նույնիսկ քայլեր չձեռնարկելու համար արժանացել ենք քննադատության, որոնք շատերի կարծիքով կարող էին բխել հեղափոխության տրամաբանությունից։ Հակառակը, ամեն ինչ արել ենք, որպեսզի համակարգի կայունությունը պահպանվի, որպեսզի նաեւ ոստիկանության համակարգն այս հեղափոխության արդյունքում իրեն զգա հաղթանակած նույնքան, որքան իրենց հաղթանակած են զգում ՀՀ քաղաքացիները եւ ընդհանրապես ողջ հայությունը Հայաստանում եւ սփյուռքում։ Մեր գործառույթների իրականացման շրջանակներում մեզնից յուրաքանչյուրը պետք է ընդամենն ունենա մի խնդիր՝ որ իր ամեն հաջորդ օրվա գործողությունը լինի առավել արդյունավետ, առավել օրինական, առավել հիմնված իրավունքի վրա, եւ ծառայությունն ամեն օրվա հետ դառնա ավելի ու ավելի նվիրված, ավելի ու ավելի մեծ ծառայություն Հայաստանի Հանրապետությանը եւ նրա ժողովրդին։ Այս ծառայության մեջ բոլորիս մաղթում եմ հաջողություն»,–եզրափակել է Նիկոլ Փաշինյանը։
Ոստիկանապետ Վալերիյ Օսիպյանը շնորհակալություն է հայտնել վարչապետին՝ նիստին ներկա գտնվելու, արժեքավոր գնահատականների ու դիտողությունների համար եւ վստահեցրել, որ ոստիկանությունը կանի ամեն ինչ՝ հանցավորության դեմ պայքարն էլ ավելի արդյունավետ եւ հասարակական կարգի պահպանությունը լիակատար դարձնելու համար։ «Ոստիկանությունն իր առջեւ դրված խնդիրը կկատարի պատշաճ, դուխով կանգնած ենք Ձեր կողքին»,–ասել է Վալերիյ Օսիպյանը։

21-07-2018





23-10-2018
Առանձնահատուկ հարաբերություններ, որոնք ավելի կամրապնդվեն
Վարչապետի պաշտոնակատար Նիկոլ Փաշինյանը աշխատանքային այց է ունեցել ...


23-10-2018
Տոնն անկեղծ էր ու մտերմիկ
Այսպիսին տեսա հոկտեմբերի 21—ը Երեւանի փողոցներում

Այսպես չէր ...


 
23-10-2018
Որոշիչը ընտրողի ձայնն է
ՏԻՄ ընտրությունները ընտրողի ազատ կամահայտնության դրսեւորում էին

«Եվրասիական ...


23-10-2018
ՏԻՄ ընտրությունների նախնական արդյունքները հայտնի են
Կիրակի օրը տեղական ինքնակառավարման մարմինների (ՏԻՄ) ընտրություններ անցկացվեցին Արագածոտնի, ...


23-10-2018
Բարեփոխումների փաթեթը չընդունվեց
Սակայն դեկտեմբերին արտահերթ ընտրությունները կկայանան

«Ֆեյսբուք» սոցիալական ցանցի ...


23-10-2018
ԵԱՏՄ ինտեգրացիոն ներուժը մեծ է
Նիկոլ Փաշինյանը մասնակցել է «Եվրասիական շաբաթ» համաժողովի բացմանը



23-10-2018
Ակնկալում են նոր պայմանագրեր
Երեւանում ընթացող «Եվրասիական շաբաթ» միջազգային ցուցահանդեսային համաժողովին, որն արդեն ...



23-10-2018
Շուշին եւ Սենտ Էտիենը եւս բարեկամացան
Ֆրանսիայի եւ Արցախի քույր քաղաքների թիվը ...

23-10-2018
Ռուդոլֆ Ջուլիանին այցելեց Ծիծեռնակաբերդ
Դոնալդ Թրամփի անձնական իրավաբան, Նյու Յորքի նախկին ...

23-10-2018
Երեւանը շուքով նշեց հիմնադրման 2800—ամյակը
Տոնական միջոցառումներն ամփոփվել են ...

23-10-2018
Նռան փառատոն Մարտունի քաղաքում
Արցախում փառաբանվել է մրգերի ...
USD
EURO
RUR
GEL
Եղանակը Երևանում
գիշերը +7... +9
ցերեկը +21... +23

Մեր մասին
Կապ
   Արխիվ

© 2006 Copyright Hayastany Hanrapetutyun daily © 2006 Design and development by WEBMAKER STUDIO