Հանրապետություն
Հասարակություն
Ներքին կյանք
Արտաքին քաղաքականություն
Տնտեսություն
Սոցիում
Մշակույթ
Գիտություն
Կրթություն
Առողջապահություն
 
Պաշտոնական
Նախագահ
Ազգային ժողով
Կառավարություն
ԱԳՆ
ՊՆ
Մայր Աթոռ
Այլք...
 
Երևան
Մարզեր
ԼՂՀ
Աշխարհ
Զանազան

06.12.2019
ՆԵՐՔԻՆ ԿՅԱՆՔ


Ի՞նչ հարցեր կլուծի բալային համակարգի ներդրումը

Օրենսդրական կարգավորումներից մինչեւ քաղաքաշինական լուծումներ

Լուսինե ՄԽԻԹԱՐՅԱՆ
l.mkhitaryan@hhpress.am

Հանրապետությունում ճանապարհատրանսպորտային պատահարների վիճակագրությունը եւ դրանց հետեւանքով վնասվածք ստացողների ու մահացածների թիվը բավականին մտահոգիչ է։ Խնդրի կարգավորման նպատակով իրականացվում են նաեւ օրենսդրական բարեփոխումներ։ Վերջերս խորհրդարանը երկրորդ ընթերցմամբ եւ ամբողջությամբ ընդունեց «Իմ քայլը» խմբակցության պատգամավորներ Սիսակ Գաբրիելյանի եւ Արմեն Փամբուխչյանի ներկայացրած նախագիծը, որով քաղաքացիներին հնարավորություն է տրվում տեսանկարահանել ճանապարհային երթեւեկության խախտումները եւ օնլայն՝ հավելվածի միջոցով փոխանցել ոստիկանությանը։
Առաջին ընթերցմամբ ընդունվել է նաեւ ՀՀ կառավարության կողմից մշակված ճանապարհային երթեւեկության կանոնակարգման բալային համակարգի ներդրման օրինագիծը։ «Վարչական իրավախախտումների վերաբերյալ ՀՀ օրենսգրքում փոփոխություններ եւ լրացումներ կատարելու մասին» եւ կից ներկայացված օրենքների նախագծերի փաթեթով նախատեսվում է տրանսպորտային միջոցներ վարելու իրավունք ունեցող անձին վարորդական վկայական ստանալու օրվանից մեկ տարի ժամկետով տրամադրել 9 միավոր։ Խախտում ամրագրելու դեպքում վարչական իրավախախտում կատարած անձին տվյալ տարում տրված ընդհանուր միավորներից ինքնաշխատ եղանակով հանվում են օրենսգրքի համապատասխան հոդվածով նախատեսված իրավախախտման համար սահմանված տուգանային միավորները։ Երթեւեկության ոլորտի 100 զանցակազմից տուգանային միավորներ նախատեսված են 20—ի համար։
ԱԺ պաշտպանության եւ անվտանգության հարցերի մշտական հանձնաժողովի անդամ Արմեն Խաչատրյանը «ՀՀ»—ի հետ զրույցում նշեց, որ առաջին ընթերցումից հետո պատգամավորների կողմից արվել են մի շարք առաջարկություններ, եւ ակնկալում են, որ լրամշակված տարբերակով նախագիծն առաջիկայում կմտնի ԱԺ օրակարգ։ «Նախագծի ընդունումն ու օր առաջ կյանքի կոչելը շատ կարեւոր են, քանի որ դրա շնորհիվ զգալի փոփոխություններ կլինեն երթեւեկության անվտանգության մասով։ Այս նախագծի հետ անուղղակիորեն պայմանավորված է նաեւ ոստիկանությունում որոշ բարեփոխումների իրականացումը, ինչպես պարեկային ծառայության կազմավորումը»,–նշեց պատգամավորը։ Բալային համակարգը գործելու է լուրջ ծրագրատեխնիկական միջոցների ներդրմամբ, այսինքն՝ այդ ամենը գրեթե ավտոմատացված է, որի շնորհիվ կոռուպցիոն ռիսկերը մեծ չեն լինելու։
Օրենքի նախագծի ընդունման ուշացման հետ կապված իր մտահոգություններով կիսվեց «Վարորդի ընկեր» ՀԿ—ի համահիմնադիր Սերգեյ Ղահրամանյանը, որի կարծիքով՝ կառավարությունն ավելի խիստ պետք է մոտենա այս ոլորտում տեղ գտած իրավախախտումներին. «Բալային համակարգը կստիպի սթափվել վարորդներին։ Այսօր մարդիկ գիտակցաբար եւ դիտավորյալ խախտումներ են անում։ Եթե տուգանվում են, վճարում են գումարը, իսկ եթե ոչ, ապա շարունակում են նույն կերպ։ Այդպիսի վարորդները երթեւեկության մեջ ստեղծում են անպատժելիության մթնոլորտի իրենց չափաբաժինը, իսկ քանի որ վատ օրինակն ավելի վարակիչ է, ուստի նման վարվելակերպը մեծ տարածում է ստանում։ Գործում է «եթե կողքինս անում է եւ չի պատժվում, ապա ես էլ կարող եմ անել» կարգախոսը»։
Թե որքանով է արդար բալային համակարգի կիրառումը՝ հաշվի առնելով քաղաքաշինական ու ճանապարհային երթեւեկության կազմակերպման հետ կապված այլ խնդիրները, Ղահրամանյանը նկատեց, որ բալային համակարգը մեծապես անկախ է եւ որեւէ կախում չունի ճանապարհների որակից, լուսավորությունից կամ գծանշումներից. «Բոլորը գիտեն, որ կարմիր լույսի տակ պետք է կանգնել, խմած չպետք է վարել ավտոմեքենան, միակողմանի փողոց չպետք է մտնել, ղեկին չպետք է ծխել, հեռախոսով խոսել, իսկ ամրագոտին էլ պետք է կապել։ Այս կանոնները պահելու համար որեւէ քաղաքաշինական նորմ կամ ճանապարհային երթեւեկության պայման պետք չէ ապահովել։ Այսպիսով՝ այն խախտումներն են բալավորված, որոնք պայմանավորված են հիմնականում վարորդի ցանկությամբ եւ նրա գործողությունների հետեւանքն են»։
Օրենսդիր մարմնի եւ հասարակական կազմակերպության ներկայացուցիչները համակարծիք են, որ ճանապարհային երթեւեկության ոլորտի կարգավորումը պահանջում է համալիր միջոցառումների իրականացում։ Միայն լավ օրենք ունենալը բավարար չէ, պետք է նաեւ բարեփոխել ճանապարհային երթեւեկության կազմակերպումը, քաղաքաշինական անհրաժեշտ միջոցառումներ կատարել, ճանապարհներն ապահովել լուսավորությամբ, գծանշումներով, կահավորմամբ։ Արմեն Խաչատրյանը հաջորդ գլխավոր խնդիրը տեսնում է հասարակական տրանսպորտի կազմակերպման մեջ. «Այսօր մենք չունենք պատշաճ հասարակական տրանսպորտ, ինչը նպաստում է, որ օրեցօր ավելանան անձնական օգտագործման տրանսպորտային միջոցները, որովհետեւ մեր բնակիչներն այլ ելք չունեն տեղաշարժվելու։ Կարգավորված հասարակական տրանսպորտային համակարգ ունենալու դեպքում շատերը ձեռնպահ կմնան ավտոմոբիլ օգտագործելուց։ Արդյունքում ե՛ւ ծանրաբեռնվածությունը կիջնի, ե՛ւ վթարների ռիսկը կնվազի»։
Բարեփոխումների շարքում է նաեւ համապատասխան կառույցի ստեղծումը ճանապարհային ոստիկանության հենքի վրա։ Դրա շնորհիվ երկու անգամ կավելանա ոստիկանության պարեկային ծառայության անձնակազմը եւ ավելի մեծ ներգրավվածություն կապահովի հասարակական կարգի պահպանման համար։
Սերգեյ Ղահրամանյանի խոսքով՝ զոհերի թվի նվազման համար առաջնային են քաղաքաշինական լուծումները, որոնք երբեւիցե չեն քննարկվում։ «Ամեն ինչ օրենքի կամ ոստիկանի վրա բարդելով հարցը չի լուծվի։ Ինչպես նախկինում, այդպես էլ հիմա ճանապարհաշինություն ասելով հասկանում են միայն ասֆալտապատում, մինչդեռ այն ներառում է նաեւ երթեւեկության անվտանգություն, անվտանգության գոտիներ եւ այլն»,–ասաց նա՝ հավելելով, որ ըստ ոստիկանության տվյալների՝ վերջին տարիներին վարորդների 70—75 տոկոսը կատարում է տարեկան մինչեւ հինգ իրավախախտում։
Տարբեր վերլուծություններ ցույց են տալիս, որ մեկ վարորդին միջին հաշվարկով ավտոտեսուչը կանգնեցնում է 2-3 տարին մեկ անգամ, ինչը գալիս է առաջին հերթին ոստիկանության կարգախմբերի պակասից։ Լուրջ խնդիր է նաեւ այն, որ ՃՈ-ն մեծամասամբ զբաղվում է ոչ թե ճանապարհային ոստիկանության գործառույթների իրականացմամբ, այլ վթարներ ձեւակերպելով։ «Այսօր միայն Երեւանում օրական միջին հաշվով ավելի քան 100 վթար է տեղի ունենում։ Եթե եղանակային վատ պայմաններ են լինում, լուսացույցն է փչացած լինում կամ այլ անբարենպաստ պայմաններ են ի հայտ գալիս, ապա վթարների թիվը հասնում է մինչեւ 180-ի։ Ստացվում է, որ ՃՈ-ն ամբողջ օրը միայն վթար է սպասարկում»,–շարունակեց նա
Զրուցակիցներս լիահույս են, որ բալային համակարգի ներդրման շնորհիվ ոլորտը ին-որ չափով կկարգավորվի, եւ դրական արդյունքները չեն ուշանա։

20-11-2019





05-12-2019
Ֆինանսական համահարթեցման նոր բանաձեւն ամբողջությամբ կգործի 2022-ից
Առաջարկվում է ներդնել ծնելիությունը խթանող լրացուցիչ գործակից

Լուսինե ՄԽԻԹԱՐՅԱՆ
l.mkhitaryan@hhpress.am




05-12-2019
Օպերային թատրոնը 60 տարի է՝ «լռում էր» սկանդալային սպանության մասին
Այսօր, վերջապես, Ջ. Վերդիի հայտնի օպերան կներկայացվի հայ ...


05-12-2019
«Արմենպրես»-101
Կարեւորագույն օղակներից մեկը

Թարգմանությունների բաժին

«Արմենպրեսի» կարեւորագույն օղակներից մեկը ...


05-12-2019
Թուրքական գումարներն են դրդել Գրեհեմին
Թուրքիայում գտնվելու ընթացքում Էրդողանը սենատոր Գրեհեմին հրավիրել է ...


05-12-2019
«Այս տարի թեթեւ ենք նշելու»
Միֆ՝ Ամանորը տոնելու մասին

Թամարա ՄՈՒՐԱԴՅԱՆ
t.muradyan@hhpress.am


Աչք թարթելու արագությամբ ...


05-12-2019
Արցախը մայր հայրենիքին կապող կյանքի ճանապարհը
Քաշաթաղի շրջանի կազմավորումից անցել է 26 տարի

Սա ...



05-12-2019
Ո՞ր ուղղություններն են «մերժել» դիմորդները
Պահանջված ու չպահանջված ...

05-12-2019
Ինչո՞ւ էին Պաստեռնակի մահվան մեջ մեղադրում Կապուտիկյանին
Ավելին՝ քարկոծում բանաստեղծուհուն ...

05-12-2019
Շոտլանդականը՝ հաջորդ հզոր անկախական շարժումը Եվրոպայում
Անկախության ձգտող երկրամասերը ելք ունեն ...

05-12-2019
Մեր գեղասահորդները հետաքրքիր մրցաշրջան են խոստանում
Հայկական սպորտին ձմեռային երանգներ են հաղորդում ոչ ...
USD
EURO
RUR
GEL
Եղանակը Երևանում
գիշերը +1... +3
ցերեկը +7... +9

Մեր մասին
Կապ
   Արխիվ

© 2006 Copyright Hayastany Hanrapetutyun daily © 2006 Design and development by WEBMAKER STUDIO