«Կապահովվեն բոլոր պետությունների շահերը»

Ռուսաստանի, Հայաստանի եւ Ադրբեջանի փոխվարչապետների համանախագահությամբ Լեռնային Ղարաբաղի զարգացման հարցերով աշխատանքային խումբը պետք է մինչեւ մարտի 1-ը ներկայացնի միջազգային փոխադրումների կազմակերպման համար տրանսպորտային ենթակառուցվածքների օբյեկտների վերականգնման եւ կառուցման միջոցառումների ցանկ: Այս մասին երեկ ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Այն պետք է հավաքվի մինչեւ այս ամսվա վերջ եւ մինչեւ այս տարվա մարտի 1-ը ներկայացնի միջոցառումների ցուցակ, որոնք վերաբերում են միջազգային տրանսպորտի կազմակերպման համար անհրաժեշտ նոր տրանսպորտային ենթակառուցվածքների վերականգնմանը եւ կառուցմանը»,-ասել է նա:
Ըստ Զախարովայի՝ ենթադրվում է, որ աշխատանքի առանցքային ոլորտներում կստեղծվեն փորձագիտական ենթախմբեր, որոնք կզբաղվեն բովանդակային հարցերով:
«Կասկած չկա, որ այդ նախագծերի իրագործումից կշահեն եւ հայկական, եւ ադրբեջանական կողմերը, եւ ամբողջ Հարավային Կովկասի տարածաշրջանը: Կապահովվեն բոլոր պետությունների շահերը: Մասնավորապես՝ Հայաստանը Ադրբեջանի տարածքով երկաթուղային մուտքի հնարավորություն կունենա դեպի Ռուսաստան եւ Իրան, տրանսպորտային հաղորդակցությունը կապելու է Ադրբեջանը Նախիջեւանի հետ Հայաստանի տարածքով»,-եզրափակել է Զախարովան:

16-01-2021