Յուրչենկոն կխաղա Հայաստանում

Հայաստանի ֆուտբոլի ազգային հավաքականի դարպասապահ Դավիդ Յուրչենկոն ելույթները կշարունակի Երեւանի «Ալաշկերտում»։
Հայտնելով այդ մասին՝ մայրաքաղաքային ակումբի մամուլի ծառայությունը, սակայն, ձեռնպահ է մնացել տեղափոխությանն առնչվող այլ մանրամասներ հաղորդելուց։ Անցյալ տարի Յուրչենկոն ընդգրկված էր Ղազախստանի Կարագանդա քաղաքի «Շախտյոր» թիմում, որի հիմնական կազմում հաստատվել չկարողացավ, եւ մրցաշրջանի ավարտին կողմերը դադարեցրին համագործակցությունը։ 34-ամյա Յուրչենկոն տարբեր տարիների հանդես է եկել նաեւ Ռուսաստանի «Կռիլյա Սովետով», «Մորդովիա», «Ուֆա», «Անժի», «Տոսնո» եւ «Ենիսեյ» ակումբներում։ Տեղափոխությունից անմիջապես հետո Յուրչենկոն «Ալաշկերտի» մամուլի ծառայությանը հայտնել է, որ շատ ուրախ է նոր կոլեկտիվում հայտնվելու համար եւ բոլոր ջանքերը կգործադրի սպասելիքներն արդարացնելու համար։ «Շնորհակալ եմ ակումբի ղեկավարությանը՝ պրոֆեսիոնալ մոտեցման եւ գործադրած ջանքերի համար։ Մեր նպատակները համընկնում են։ Ուզում եմ օգտակար լինել ակումբիս եւ Հայաստանի հավաքականին»,- նշել է Յուրչենկոն, որն անցյալ տարվա սեպտեմբերից պաշտպանում է մեր երկրի ազգային ընտրանու դարպասը եւ 6 հանդիպման է մասնակցել Ազգերի լիգայի շրջանակներում։

Հրայր ՆԱԶԱՐՅԱՆ

16-01-2021