Քննարկել են ԼՂ հակամարտության գոտում հետպատերազմյան իրադրությունը

Հայաստանի Հանրապետության արտաքին գործերի նախարար Արա Այվազյանը երեկ հեռախոսազրույց է ունեցել Ֆրանսիայի արտաքին գործերի նախարար Ժան-Իվ Լը Դրիանի հետ։ Այս մասին հայտնել են ՀՀ ԱԳՆ լրատվության եւ հանրային դիվանագիտության վարչությունից:
Զրուցակիցները հանգամանալից անդրադարձել են Լեռնային Ղարաբաղի հակամարտության գոտում հետպատերազմյան իրադրությանը, տարածաշրջանային անվտանգության եւ խաղաղության հարցերի:
Ներկայացնելով հրադադարի հաստատման եւ Արցախում խաղաղապահների տեղակայման վերաբերյալ նոյեմբերի 9-ի եռակողմ հայտարարության դրույթների կյանքի կոչման ընթացքը՝ նախարար Այվազյանն իր ֆրանսիացի գործընկերոջ ուշադրությունն է հրավիրել հրատապ լուծում պահանջող հումանիտար հարցերի լիարժեք հասցեագրման անհրաժեշտության վրա, մասնավորապես՝ ռազմագերիների եւ պատանդի կարգավիճակում հայտնված քաղաքացիական անձանց հայրենադարձման մասով:
Հայաստանի եւ Ֆրանսիայի ԱԳ նախարարները մտքեր են փոխանակել նաեւ Արցախում ստեղծված հումանիտար ճգնաժամի հասցեագրման ուղղությամբ ձեռնարկվող քայլերի շուրջ՝ ընդգծելով այդ գործընթացում միջազգային կազմակերպությունների ուղիղ եւ անխափան ներգրավվածության անհրաժեշտությունը:
Նախարարներ Այվազյանի եւ Լը Դրիանի զրույցի առանցքային թեմաներից են եղել նաեւ Արցախի՝ ադրբեջանական վերահսկողության ներքո հայտնված տարածքներում պատմամշակութային եւ կրոնական ժառանգության պահպանման ուղղությամբ քայլերը եւ այդ գործընթացում միջազգային մասնագիտացված կառույցների դերը: Նախարար Այվազյանն ընդգծել է, որ հարցի հրատապությունն առավել ընդգծվում է հայկական ժառանգության ոչնչացման եւ ինքնության խեղաթյուրման ուղղությամբ Ադրբեջանի կողմից ձեռնարկվող ջանքերի լույսի ներքո:
Հեռախոսազրույցի ընթացքում անդրադարձ է կատարվել ԵԱՀԿ Մինսկի խմբի համանախագահության շրջանակներում խաղաղ գործընթացի վերսկսմանը եւ այդ առնչությամբ համանախագահների առաջիկա ժամանակացույցին: Զրուցակիցները մտքեր են փոխանակել նաեւ երկկողմ օրակարգի մի շարք հարցերի եւ տարբեր մակարդակներում երկխոսության ակտիվացման շուրջ:

22-01-2021