Հայ մարմնամարզուհիների մոսկովյան մեկնարկը

Հայաստանի գեղարվեստական մարմնամարզուհիները նոր մրցաշրջանը սկսեցին Մոսկվայում անցկացված միջազգային հեղինակավոր մրցաշարին մասնակցությամբ։
Վարկանիշային համարում ունեցող մոսկովյան «Գրան պրի»-ին ներկայացել էին շուրջ 20 երկրի ուժեղագույն մարզուհիներ։ Մեծահասակների մրցումների անհատական բազմամարտում Սիլվա Սարգսյանը բոլոր չորս վարժությունների կատարման հանրագումարում վաստակելով 73,20 միավոր՝ 23 նազելիների հաշվարկում ճանաչվեց 17-րդը։ Նա առավել հաջողեց օղակով վարժությունում, որից զբաղեցրեց 15-րդ տեղը։ Ժապավենով մրցաձեւում 18-ամյա երեւանցին 17-րդն էր, իսկ գնդակով եւ գուրզերով՝ 19-րդը։ Առաջին երեք տեղերը պահպանեցին ռուսաստանցի մարզուհիները՝ Դինա (109,00) եւ Արինա (107,60) Ավերինա քույրերը ու Լալա Կրամարենկոն (104,45)։ Քույրերն աշխարհի ու Եվրոպայի բազմակի չեմպիոնուհիներ են։ Կրտսեր տարիքի աղջիկների մրցումներում Միլենա Ասրյանը եւ Անժելիկա Կարախանյանը բազմամարտում վաստակելով համապատասխանաբար 72,20 ու 63,05 միավոր՝ գրավեցին 9-րդ եւ 11-րդ տեղերը։ Հաղթեց ռուս Աննա Պոպովան՝ 91,85 միավոր։ Տարիքային այս խմբում ուժերը փորձեց 15 մարզուհի։

Հրայր ՆԱԶԱՐՅԱՆ

23-02-2021