Արյունաբանական կենտրոնում բուժվող երեխաներն իրենց ցանկությունները հայտնեցին Աննա Հակոբյանին

ՀՀ վարչապետի տիկին, «Իմ քայլը» ե «City of smile/Ժպիտների քաղաք» բարեգործական հիմնադրամների հոգաբարձուների խորհրդի նախագահ Աննա Հակոբյանը երեկ Հայաստանում ՌԴ դեսպան Սերգեյ Կոպիրկինի եւ դեսպանի տիկնոջ՝ Թամարա Կոպիրկինայի, «Գեոպրոմայնինգ գոլդ» կազմակերպության գլխավոր տնօրեն Անատոլի Գոգոտինի հետ այցելել է պրոֆ. Ռ. Յոլյանի անվան արյունաբանական կենտրոն։ Աննա Հակոբյանը եւ դեսպանը շնորհավորել են արյունաբանական կենտրոնում բուժում ստացող քաղցկեղ եւ արյան հիվանդություններ ունեցող երեխաների գալիք Ամանորը։ Հյուրերը փոքրիկների հետ միասին դիտել են Ամանորի գեղեցիկ ներկայացում, այնուհետեւ հանդիսավոր կերպով վառել հիվանդանոցի բակում տեղադրված տոնածառի լույսերը։ Միջոցառման ընթացքում փոքրիկներին է այցելել Ձմեռ պապն ու երեխաներին հանձնել Ամանորի նվերները։
«Ժպիտների քաղաք» բարեգործական հիմնադրամի գործադիր տնօրեն Էսթեր Դեմիրճյանը նշեց, որ վարչապետի տիկինն այսօր կենտրոնում արյան դոնոր է լինելու։  Իսկ միջոցառման վերաբերյալ Դեմիրճյանն ասաց, որ ուզում են՝ երեխաները հավատան հրաշքին։ Նա ինքն էլ հավատում է, որ հրաշքներն իրականություն են դառնալու, եւ կենտրոնում բուժում ստացող երեխաներն ի վերջո բուժվելու ու տուն են  գնալու։ Բայց մինչ այդ նրանք հիվանդանոցի ու հիվանդասենյակների պատուհաններից հետեւեցին բակում տեղադրված տոնածառի լույսերի միացման արարողությանն ու իրենց ցանկությունները հայտնեցին Աննա Հակոբյանին։
Հեռուստացույց, թութակ, համակարգիչ… Ա. Հակոբյանը խոստացավ՝ բոլորի ցանկությունները կիրականանան։ Երեխաներից մեկն էլ ոտքի կանգնելով՝ ասաց, որ իր հասակի տիկնիկ է ուզում՝ դա մի Ձմեռ պապից, երկրորդից էլ հավաքածու է ուզել։
Սերգեյ Կոպիրկինը նշեց, որ նախատոնական այս օրերին ուրախ է ներկա գտնվել այդ միջոցառմանը։ Իսկ երեխաներին առաջին հերթին մաղթեց առողջություն ու բարձր տրամադրություն. «Թող որ այդ տրամադրությունն ուղեկցի գալիք տարվա ողջ ընթացքում»։
Երեխաները, իսկապես, ուրախ էին։ Բայց ահա նրանց ծնողները գաղտնի՝ երեխաների աչքերից հեռու, արցունքներն էին սրբում՝ շարունակելով ոգեւորել նրանց ու վայրկյաններն անմահացնել տեսաֆոտոխցիկներով։