Թուրքիան չի հրաժարվում սպառնալիքի լեզվով խոսելուց

Կարսում նախատեսվում են թուրք-ադրբեջանական համատեղ զորավարժություններ

Հայաստանին սահմանակից Կարս քաղաքում Թուրքիան ու Ադրբեջանը փետրվարի 1-12-ը նախատեսում են անցկացնել համատեղ զորավարժություններ։ Թուրքական լրատվամիջոցները գրում են, որ ձմեռային այս զորավարժություններն ամենամասշտաբայինն են լինելու վերջին տարիների կտրվածքով։ Դրանցում ներգրավված են լինելու տանկային եւ հրետանային ստորաբաժանումներ, դիպուկահարների խմբեր, հատուկ ջոկատայիններ եւ օդուժ։
Թուրքական «Ahaber» լրատվամիջոցը նշում է, որ զորավարժությունների ընթացքում դաշտային փորձարկումներ են անցնելու այն զինատեսակները եւ տրանսպորտային միջոցները, որոնք մշակվում են պաշտպանական արդյունաբերության ձեռնարկությունների կողմից եւ նոր են ներառվել ցուցակում: Մյուս խնդիրներից է զորքերի մարտական կարողությունների փորձարկումը, ներառյալ հրաձգությունը ձյան հաստ շերտի եւ սառնամանիքի պայմաններում: Թշնամին զորավարժությունների ընթացքում նախատեսում է մշակել նաեւ գրոհներ եւ օդային հարձակման գործողություններ ձմռան պայմաններում։
Այն, որ զորավարժությունների թիրախը Հայաստանն է, հուշում է նախեւառաջ դրանց անցկացման վայրի ընտրությունը։ Լրատվամիջոցը չի էլ թաքցնում, որ թուրք-ադրբեջանական համատեղ զորավարժությունների թիրախը մենք ենք։ «Առաջիկա այդ զորավարժությունը ուժի ցուցադրում է Հայաստանին»,-հաղորդում է «Ahaber»-ը։ Բացահայտ ագրեսիայի ցուցադրումն անսպասելի չէր, հաշվի առնելով այն, որ Թուրքիան եւ Ադրբեջանը պատասխանատվության չեն ենթարկվել Արցախում պատերազմական գործողությունների ընթացքում գործած հանցագործությունների համար։ Ավելին, տարբեր երկրներ հետաքրքրություն են ցուցաբերում թուրքական զինատեսակների նկատմամբ եւ Թուրքիայի հետ համագործակցության մասով։ «Ermenihaber»-ի տեղեկացմամբ, Թուրքիայի պաշտպանության նախարար Հուլուսի Աքարն ու գլխավոր շտաբի պետ Յաշար Գյուլերը երեկ պաշտոնական այցով մեկնել են Բաղդադ։ Թուրքիայի ՊՆ-ն հաղորդում է, որ հանդիպումներ են նախատեսված Թուրքիայի ռազմաքաղաքական ղեկավարության եւ Իրաքի նախագահ Բարհամ Սալիհի, վարչապետ Մուստաֆա ալ-Քազիմիի, ինչպես նաեւ պաշտպանության նախարար Ջումա Անադի հետ։ Նշվում է, որ Հուլուսի Աքարի այցի հիմնական թեման ահաբեկչության դեմ պայքարում Թուրքիայի եւ Իրաքի միջեւ համագործակցությունն է։ Նկատենք, որ ահաբեկչությունն ու ահաբեկիչ խմբավորումներին հովանավորող Թուրքիայի կողմից նման օրակարգի սահմանումը բավականին մտահոգիչ է հնչում։
Ռազմական ոլորտում համագործակցությունից բացի, մի շարք երկրներ էլ առաջարկում են իրենց աջակցությունը Արցախից բռնազավթած հայկական տարածքներում տարբեր նախաձեռնություններով հանդես գալու համար։ Մասնավորապես՝ Հունգարիայի արտաքին գործերի նախարար Պետեր Սիարտոն հայտարարել էր, որ իր երկիրը պատրաստ է օգնել Ադրբեջանին Արցախի տարածքում շինարարական աշխատանքներ իրականացնելու համար։ Հունգարիայի կառավարությունն առաջարկել է 250 հազար եվրոյի աջակցություն ականազերծման աշխատանքներ իրականացնելու նպատակով։ Հիշեցնենք, որ Հայաստանը 2012 թվականին կասեցրեց դիվանագիտական հարաբերությունները Հունգարիայի հետ, քանի որ Հունգարիայի իշխանությունները Ադրբեջանին արտահանձնեցին 2004 թվականին Բուդապեշտում հայազգի սպա Գուրգեն Մարգարյանին կացնահարած ադրբեջանցի սպա Ռամիլ Սաֆարովին։ Իհարկե, երկու երկրների հետաքրքրությունների կենտրոնում է էներգետիկ համագործակցությունը։ Հունգարական կողմն ակնկալում է, որ մինչեւ 2025 թվականը ադրբեջանական գազը մուտք կգործի Հունգարիա։
Թուրքիայում ֆինանսատնտեսական ճգնաժամի ֆոնին, ռազմական ուղղությամբ գրանցած հաջողությունները ստիպում են այդ երկրի իշխանությանը՝ իրացնելու ռազմական ներուժը։ Ներկայումս թուրքական տնտեսության այն մասը, որը սպասարկում է ռազմական ոլորտը, դեռեւս բավականին մրցունակ է եւ առավելագույն չափով փորձ է արվում օգտագործել։ Այսինքն՝ կարող ենք փաստել, որ Թուրքիան իրացնում է իր ռազմական ներուժը՝ լուծելով նաեւ տնտեսական եւ աշխարհաքաղաքական խնդիրները։ Ակամա հայտնվելով թուրքական նվաճողական քաղաքականության կիզակետում, Հայաստանին այլ բան չի մնում, քան բնական դաշնակիցների հետ քայլեր ձեռնարկել Թուրքիայի ագրեսիան սանձելու համար։

Լուսինե ՄԽԻԹԱՐՅԱՆ

19-01-2021