Սահմանամերձ համայնքների երեխաները անմոռանալի տպավորություններ կտանեն իրենց հետ մայրաքաղաքից

Մինչ Երեւանում եւ մարզերում դիտվող չափազանց շոգ եղանակը հոգս է դարձել մեծերի համար, երեխաներին կիզիչ ճառագայթներն այնքան էլ չեն մտահոգում։ Կարեւորն այն է, որ նրանց առօրյան հետաքրքիր լինի, բազմազան։ Իսկ նման առօրյա այսօր, ցավոք, ոչ բոլոր վայրերում է հնարավոր ապահովել, հատկապես մարզերում, առավել եւս սահմանամերձ համայնքներում։ Հեռավոր համայնքների երեխաները շատ ժամանակ անհաղորդ են մնում մայրաքաղաքում տեղի ունեցող կրթական, մշակութային իրադարձություններին։ Եվ այս խնդիրը լուծելու համար նախաձեռնությամբ են հանդես եկել «Իմ քայլը» եւ «City of smile/ժպիտների քաղաք» բարեգործական հիմնադրամները։ Հայաստանի սահմանամերձ գյուղերի ավելի քան 700 երեխաներ ամառային արձակուրդների շրջանակում կայցելեն Երեւան, կլինեն պատմամշակութային, զվարճանքի վայրերում, զբոսայգիներում, նոր ընկերներ ձեռք կբերեն։
Սահմանամերձ բնակավայրերի դպրոցահասակ երեխաների համար է անցկացվում նաեւ ազգային պատկերասրահի նախաձեռնած ամենամյա ինտերակտիվ—կրթական ծրագիրը, որի աջակիցներն այս տարի հենց վերոնշյալ հիմնադրամներն են։
Ծրագրի շրջանակներում ՀԱՊ—ն այս անգամ հյուրընկալել էր Արարատի մարզի սահմանամերձ Երասխավան եւ Արմաշ համայնքների փոքրիկներին։
Ամառային դպրոցն այս տարի նախապատրաստել է երեք տարբեր դասընթացներ՝ «Հին ծրագրեր», «Նոր ծրագրեր» եւ «Ամենից ամենա»։ Հիմնական նպատակը դասընթացի մասնակիցներին կերպարվեստի տեսակների, ժանրերի, նյութերի, որոշ տեխնիկական միջոցների, ինչպես նաեւ հայ եւ այլազգի մեծանուն արվեստագետների մասին ընդհանուր գիտելիքներ հաղորդելն է։ Նրանց համար կազմակերպվում են ինտերակտիվ խաղ—էքսկուրսիաներ, թեմատիկ դասեր, գործնական պարապմունքներ, ինչպես նաեւ ֆիլմերի եւ մուլտֆիլմերի դիտումներ։
Այս ընթացքում, բացի Արարատի մարզի Երասխ եւ Արմաշ գյուղերից, Երեւան են այցելել Տավուշի մարզի Բաղանիս, Այգեպար, Ոսկեպար, Ներքին Կարմիրաղբյուր, Վերին Կարմիրաղբյուր համայնքների երեխաները։