Ուջանում նշվեց Անդրանիկ Օզանյանի ծննդյան 145–ամյակը

Զորավար Անդրանիկ Օզանյանի 145—ամյակի կապակցությամբ երեկ «Զորավար Անդրանիկ», «Ուխտ Արարատի», «Սասուն», «Տարոն» հասարակական կազմակերպությունների ներկայացուցիչները, երիտասարդներ, մտավորականներ եւ հասարակական գործիչներ այցելեցին Եռաբլուր պանթեոն՝ ծաղիկներ եւ ծաղկեպսակ դնելով նրա շիրմին, հարգելով զորավարի հիշատակը։ Հայ առաքելական եկեղեցու սպասավորների կողմից մատուցվեց սուրբ պատարագ։
Հայաստանի Հանրապետության մշակույթի նախարարության մշակութային քաղաքականության վարչության պետ Կարո Վարդանյանն «Արմենպրեսի» հետ զրույցում նշեց, որ Անդրանիկը բոլոր հին ու նոր հերոսների փառքը խտացնող հերոս է։ «Նա այն միակ զորավարն էր, որը, երբեք չունենալով բանակ, պարտության դառնությունը չի ճաշակել»,–փաստեց Կ. Վարդանյանը։
Ըստ Երեւանի փոխքաղաքապետ Կամո Արեյանի՝ այս օրը պետք է լինի համաժողովրդական տոն։ «Անդրանիկի մեջ բոլորը տեսել են ջերմ հայրենասերին, Հայաստանի ազատության մարտիկին, որ խորապես սիրում էր իր հայրենիքը։ Հայ ժողովուրդը միշտ պետք է գնահատի իր հերոսի գործադրած ջանքերը Հայաստանի դարավոր թշնամու դեմ պայքարում՝ ազգային իդեալները իրագործելու համար»,–ասաց Կ. Արեյանը։
Արագածոտնի մարզի Ուջան գյուղը առանձնանում է նրանով, որ հանրապետությունում առաջին անգամ այստեղ է տեղադրվել զորավար Անդրանիկի հուշարձանը։ Տասնամյակներ առաջ էր դա՝ 1967 թվականին, երբ խորհրդային իշխանության տարիներին այնքան փակ ու անձեռնմխելի էին հայոց պատմությունն ու նրա հերոսների ազգանվեր գործունեության մասին հիշատակումները։ Այդ կերտմանը մասնակից եղավ ողջ գյուղը՝ իր նյութական ու բարոյական աջակցությամբ։
Հուշարձանի տեղադրմամբ սկիզբ դրվեց մեծ զորավարի ծննդյան տարեդարձը՝ փետրվարի 25—ը, հանդիսավորապես նշելու ավանդույթին, որը շարունակվելով տասնամյակներ, հաստատում է ուջանցիների հայրենասիրական ոգին։
Այս տարի եւս այդ օրը բազմամարդ էր Ուջանում։ Ոտքի էր ելել ողջ գյուղը՝ հյուրընկալելու մեծ զորավարի 145—ամյա հոբելյանի տոնակատարության մասնակիցներին։ Նրանք եկել էին մարզկենտրոն Աշտարակից, հարեւան համայնքներից ու մայրաքաղաք Երեւանից։
Գլխավոր հավաքատեղին Անդրանիկի հուշարձանին հարող տարածքն էր։ Հանդիսությունը սկսվեց Արագածոտնի թեմի առաջնորդական տեղապահ տ. Մկրտիչ վարդապետ Պռոշյանի օրհնանքով։ Ապա շնորհավորանքի իրենց խոսքերը հղեցին հրավիրյալները։ Նրանք հետաքրքիր մանրամասներ պատմեցին զորավարի կյանքից, եւս մեկ անգամ ընդգծելով նրա վառ անհատականությունը՝ իբրեւ մեծ հայրենասեր, զորահրամանատար եւ քաղաքական գործիչ։
Շնորհավորելով ուջանցիներին օրվա խորհրդի՝ Անդրանիկ Օզանյանի հոբելյանի կապակցությամբ, մարզպետ Սարգիս Սահակյանը կարեւորեց եւ, հիրավի, արդիական համարեց զորավարի հետեւյալ միտքը. «Ամեն օր գլուխներդ բարձին դնելուց եւ քնանալուց առաջ հիշեք, թե այդ օրը ինչ եք արել ձեր ազգի համար»։
Օրը Ուջանում երկակի էր հանդիսավոր, քանի որ մեծն զորավարի հոբելյանական տարեդարձին համատեղվել էր եւս մեկ իրադարձություն։ Հիմնովին վերանորոգումից հետո շահագործման հանձնվեց բժշկական ամբուլատորիան։