Սերժ Սարգսյանը մասնակցել է ՀՀ ՍԴ 15—ամյակի առիթով կազմակերպված պաշտոնական ընդունելությանը

Նախագահ Սերժ Սարգսյանը երեկ կառավարության ընդունելությունների տանը մասնակցել է Հայաստանի Հանրապետության Սահմանադրական դատարանի 15—ամյակի առիթով կազմակերպված պաշտոնական ընդունելությանը, հայտնում են ՀՀ նախագահի մամլո գրասենյակից։
ՀՀ Սահմանադրական դատարանի կողմից վերջին երկու ամիսների ընթացքում օրենքի սահմանադրականության հարցով ավելի շատ գործեր են քննվել, քան դատարանի կազմավորման առաջին տասնամյակում։
Այս մասին, ըստ «Արմենպրեսի», երեկ իր խոսքում նշեց ՀՀ Սահմանադրական դատարանի նախագահ Գագիկ Հարությունյանը։ Նրա տեղեկացմամբ՝ 1996—2010 թթ. ընթացքում ՀՀ Սահմանադրական դատարանը դատաքննության վերջնական արդյունքներով ընդունել է 931 որոշում, մի շարք միջազգային իրավական կազմակերպությունների հետ համատեղ Երեւանում կազմակերպել է 22 միջազգային խորհրդաժողով։
ՍԴ անդամների կողմից հայերենով, ռուսերենով, ֆրանսերենով, անգլերենով հրատարակվել է 53 բնագրություն, շուրջ 350 գիտական հոդված եւ զեկույցներ են ներկայացվել 60—ից ավելի միջազգային խորհրդաժողովներում։
«Անցած տարիների դասերը վկայում են, որ երկրում սահմանադրական ժողովրդավարության հաստատումն ու զարգացումը շարունակական լուրջ ու հետեւողական քայլեր են պարունակում։ Դա վերաբերում է նաեւ սահմանադրական վերահսկողության եւ սահմանադրական արդարադատության համակարգային հետագա կատարելագործմանը, սահմանադրական ախտաբանության այնպիսի համակարգի ներդրմանը, որը կդառնա իրավական պետության կայացման, քաղաքացիական հասարակության ձեւավորման, երկրի կայունության եւ կայացման հուսալի երաշխիք»,–ասաց Գ. Հարությունյանը՝ վստահություն հայտնելով, որ ՀՀ Սահմանադրական դատարանը անցած տարիների դասերն ու ժամանակի մարտահրավերները հաշվի առնելով՝ հետագայում նույնպես կիրականացնի իր բացառիկ կարեւոր առաքելությունը։
Հիշեցնենք, որ 2011 թ. փետրվարի 6—ին լրացել է ՀՀ Սահմանադրական դատարանի կազմավորման 15—ամյակը, ինչի կապակցությամբ էլ դատարանը նախաձեռնել է մի շարք միջոցառումներ։ «Փետրվարի 4—ին կազմակերպվել են Սահմանադրական դատարանի որոշումների ժողովածուի ու դատարանի տեղեկագրի հոբելյանական համարի շնորհանդեսները, բացվել է «Մեր Սահմանադրությունը եւ արվեստ» գեղանկարների ինքնատիպ ցուցահանդեսը»,–նշեց Գ. Հարությունյանը՝ հավելելով, որ հոբելյանական միջոցառումների շրջանակներում այս տարվա հոկտեմբերի 6—8—ը հրավիրվելու է միջազգային խորհրդաժողով, որին կմասնակցեն տասնյակ երկրների իրենց գործընկերները։
«Անցած 15 տարիներին ՀՀ Սահմանադրական դատարանը որդեգրեց իր գործունեության իրավական ու կառուցակարգային առկա երաշխիքները հնարավորինս լիարժեք իրացնելու եւ հանրային կյանքում սահմանադրական մշակույթի որոշակի որակ ապահովելու ռազմավարությունը, որն իր նպաստը բերեց նաեւ երկրում հետագա սահմանադրաիրավական զարգացումների գործին»,–ընդգծեց Սահմանադրական դատարանի նախագահը։
Գագիկ Հարությունյանը նաեւ տեղեկացրեց, որ վերջին 4 տարիների ընթացքում վերացական վերահսկողության կարգով ՀՀ Սահմանադրական դատարանում ստացվել է 208, կոնկրետ վերահսկողության կարգով՝ 1327 դիմում։ Իրենց սահմանադրական իրավունքների պաշտպանության հարցերով խորհրդատվության համար Սահմանադրական դատարան է դիմել 2265 քաղաքացի։ Միաժամանակ, վերջին 4 տարում 88 անհատական դիմումների հիման վրա 37 գործերով օրենքների վիճարկվող դրույթները ճանաչվել են ՀՀ Սահամանդրությանը հակասող եւ անվավեր, որը կազմում է կոնկրետ վերահսկողության կարգով վերջնական դատաքննության առարկա դարձած գործերի ավելի քան 40 տոկոսը։