|
Փորձի ու գիտելիքների համատեղմամբ 
Ստոմատոլոգների միջազգային վեհաժողով Երեւանում
Երեւանի Մ. Հերացու անվան պետական բժշկական համալսարանում մայիսի 24–ին մեկնարկեց ստոմատոլոգների միջազգային երկրորդ վեհաժողովը, որի բացմանը ներկա էին ոչ միայն Հայաստանի եւ Լեռնային Ղարաբաղի լավագույն մասնագետները, այլեւ մի շարք երկրների պատվիրակություններ։
Ողջունելով վեհաժողովի մասնակիցներին՝ ԵՊԲՀ—ի ռեկտոր, պրոֆեսոր Դերենիկ Դումանյանն ասաց. «Վեհաժողովի 700 մասնակիցների թվում են ԱՄՆ—ի, Կանադայի, Գերմանիայի Դաշնային Հանրապետության, Շվեյցարիայի, Ֆինլանդիայի, Իրանի, Ռուսաստանի Դաշնության, Ուկրաինայի, Վրաստանի պատվիրակությունները՝ իրենց ճանաչված մասնագետներով»։
Այնուհետեւ Դերենիկ Դումանյանը համառոտ ներկայացրեց ԵՊԲՀ—ի ստոմատոլոգիական ֆակուլտետի անցած ճանապարհը։
Կարեւորելով վեհաժողովը՝ ՀՀ առողջապահության նախարար Հարություն Քուշկյանը նշեց. «Մեր ստոմատոլոգիան միշտ եղել է առաջադեմ եւ աշխարհին ներկայանալի։ ՀՀ առողջապահության նախարարությունը մշտապես հպարտացել է մեր մասնագետներով եւ աջակցել լավագույն նպատակային ծրագրերին»։
Նա միաժամանակ իր մտահոգությունը հայտնեց այն խնդրի շուրջ, որ ոլորտում առաջացել է՝ որոշ մասնագետների ոչ բարեխիղճ աշխատանքի պատճառով։
Վեհաժողովին ուղերձներ էին հղել Եվրոպայում ատամնաբուժական կրթության ասոցիացիայի նախագահ, պրոֆեսոր Սեսիլլիա Քրիսթերսոնը, Մոսկվայի Ա. Ի. Եվդոկիմովի անվան բժշկական—ստոմատոլոգիական համալսարանի ռեկտոր, ՌԴ ԱՆ գլխավոր ստոմատոլոգ, ՌԴ վաստակավոր բժիշկ, պրոֆեսոր Օ. Օ. Յանուշեւիչը եւ ստոմատոլոգիական ֆակուլտետի դեկան, պրոֆեսոր Ա.Վ. Միտրոնինը, Օմսկի պետական բժշկական ակադեմիայի ռեկտոր, պրոֆեսոր Ա. Ի. Նովիկովը, Թբիլիսիի պետական բժշկական համալսարանի ռեկտոր, պրոֆեսոր Զուրաբ Վադաչկորիան։
Ստոմատոլոգիական կրթություն եւ գիտություն ասոցիացիայի Ոսկե մեդալներ շնորհվեցին ՀՀ առողջապահության նախարար, պրոֆեսոր Հարություն Քուշկյանին, ինչպես նաեւ ստոմատոլոգիայի զարգացման գործում մեծ ավանդ ունեցած մի խումբ բժիշկների՝ բ.գ.դ., ՀՀ ԳԱԱ ակադեմիկոս Վիլեն Հակոբյանին, ստոմատոլոգիական ֆակուլտետի առաջին դասախոսներից պրոֆեսոր Խաչատուր Բադալյանին, ՀՀ գիտության վաստակավոր գործիչ, բ.գ.դ., պրոֆեսոր Վալերի Տատինցյանին, պրոֆեսորներ Վահագն Կիրակոսյանին, Կարեն Լալայանին, Վիկտոր Մելքումովին, բժշկագիտության բնագավառում հայտնագործության հեղինակ Պավել Մայիլյանին, ստոմատոլոգիական ֆակուլտետի առաջին շրջանավարտներ, ապա՝ դասախոսներ Հասմիկ Խաչատրյանին եւ Էդգար Եղիկյանին, Երեւանի պետական բժշկական ինստիտուտի առաջին նպատակային ասպիրանտ Աննա Մինալյանին։
Երեք օր շարունակ վեհաժողովի մասնակիցները կփոխանակեն իրենց փորձն ու գիտելիքները, կներկայացվեն ստոմատոլոգիայի ժամանակակից ձեռքբերումներին նվիրված զեկույցներ։
Վեհաժողովի շրջանակներում կազմակերպվել է ստոմատոլոգիական նյութերի, գործիքների եւ սարքավորումների ցուցահանդես։ 25-05-2012
|
