Քննության համար տարիների աշխատանք է պետք

Ոգեւորությունը երկար չտեւեց. շտեմարանային երկրորդ քննության՝ մաթեմատիկայի վատ արդյունքները ստվեր գցեցին հայոց լեզվի եւ գրականության բարձր ցուցանիշների վրա։ «Հայոց լեզու եւ հայ գրականություն» առարկաների միասնական քննության միջին միավորը կազմել է 13,9։ Նախնական տվյալների համաձայն, մաթեմատիկայի ընդունելության քննության միջին միավորը 11 է։ Այդ քննության վերջնական արդյունքները կփակցվեն վաղը, բողոքարկումը կիրականացվի հունիսի 18—ին։
«Մաթեմատիկայի շտեմարանային սիստեմը չփրկեց այն դիմորդներին, ովքեր փորձել էին անգիր անել։ Պարզվեց, որ «Մաթեմատիկան» իրոք բարդ առարկա է»,—երեկ օտար լեզուների քննության ժամանակ կես կատակ—կես լուրջ ասաց գնահատման եւ թեստավորման կենտրոնի մշակումների եւ առարկայական բաժնի պետ Գուրգեն Խաչատրյանը՝ շեշտելով, որ իրականում այդ առարկան հաղթահարելը կամ անգիր անելն այդքան էլ հեշտ չէ։ «Մաթեմատիկա քննություն հանձնելու համար տարիների աշխատանք է պետք։ Իսկ եթե դիմորդը վերջում է կողմնորոշվում մասնագիտության հարցում, ապա գոնե պետք է երկու տարի աշխատի։ Այս առարկայի դեպքում մակերեսային ընկալումները չեն անցնում, պետք է խորությամբ ընկալել։ Առհասարակ, թեստային քննությունը բախտախնդրություն չէ։ Այդպիսի պնդումներն անհիմն են»,—ասաց նա՝ ավելացնելով, որ քննական համակարգը դեռ կատարյալ չէ, քանի որ ոչ մի համակարգ այդպիսին չի լինում՝ անգամ թեստայինը, թեպետ դա հիմա գործող լավագույն ձեւերից մեկն է եւ արդարացնում է իրեն։
Այս տարվա հայոց լեզվի եւ գրականության քննության մասով դա միանշանակ է։ Սակայն ռուսերենի առումով նույնը չենք կարող ասել, համենայն դեպս, դիմորդների տեսանկյունից։
Այս տարի ռուսերենն էլ չփայլեց իր արդյունքներով։ Միջին միավորը 10,3 է։ 20 միավոր ստացող դիմորդ չի գրանցվել։ Մեկ հոգի ստացել է 19,75 միավոր, մեկ դիմորդ էլ՝ 19,5։ 17.5—20 միավոր ստացել է մասնակիցներից 32—ը (2.7 տոկոս), 13.5—17.25 միավոր՝ 206—ը (17.4 տոկոս), 7.5—13.25 միավոր՝ 684—ը (57.9 տոկոս), դրական՝ 7.5 միավորի շեմը չի հաղթահարել 22 տոկոսը կամ մասնակիցներից 260—ը։ Դիմում—հայտ ներկայացրած 1285 դիմորդից քննությանը մասնակցել է 1182—ը, բացակայել՝ 103—ը։
Մյուս՝ օտար լեզուների արդյունքների մասին՝ հաջորդիվ։ Մինչ այդ նշենք, որ երեկ դիմորդները քննություն հանձնեցին «Անգլերեն», «Գերմաներեն», «Ֆրանսերեն», «Իսպաներեն», «Իտալերեն» եւ «Պարսկերեն» առարկաներից։ Մ. Հերացու անվան պետական բժշկական համալսարանում ձեւավորված քննակենտրոնում անգլերենից քննությանը պետք է ներկա լիներ 199 դիմորդ։ Սակայն նրանցից 7—ը բացակայում էին։ Անգլերենից քննություն հանձնելու համար դիմում–հայտ էին ներկայացրել 8 հազար 173 դիմորդ։
Դիմումների թվով երկրորդ տեղում գերմաներենն էր՝ 521 հայտ։ Ֆրանսերեն էլ ուներ 447 դիմորդ։ Այս տարի ավելացել էր իսպաներեն հանձնել ցանկացողների թիվը՝ 25։ Իտալերենի համար հայտագրվել էր 4, պարսկերենի համար՝ 5 դիմորդ։

Թամարա ՄՈՒՐԱԴՅԱՆ