|
Բարեփոխումների մարդակենտրոն ծրագիր է մշակվել 
Հայաստանը մի շարք ոլորտներում առաջ է Եվրոպայից
Հայաստան—Եվրամիություն հարաբերությունների առանցքային ոլորտներից մեկն արդարադատությունն է։
«Արմենպրեսի» հաղորդմամբ, հունիսի 28—ին Արդարադատության, ազատության եւ անվտանգության հարցերով Հայաստան—ԵՄ ենթահանձնաժողովի 3—րդ նիստի ժամանակ այս մասին հիշեցրեց ՀՀ արդարադատության նախարար Հրայր Թովմասյանը։ Հայաստան—ԵՄ համագործակցությունը նա պատկերավոր ձեւով համեմատեց թռիչքի պատրաստվող ինքնաթիռի հետ։ «Ինքնաթիռը տասն անգամ ավելի շատ էներգիա է ծախսում արագություն հավաքելու, էլ ավելի մեծ էներգիա՝ բարձրություն վերցնելու համար։ Գետնից պոկվելով՝ ինքնաթիռը կամ պետք է թռչի, կամ վթարվի. այլ տարբերակ չկա»,— ասաց Թովմասյանը։
Նախարարը նկատեց, որ մեր երկրում երկար տարիներ հավաքների ազատության խնդիր է եղել։ Այժմ գործում է «Հավաքների ազատության մասին» օրենքը, որը համապատասխանում է եվրոպական չափանիշներին։ Հանրային կարծիքն էական նշանակություն է ստացել։ Դրա լավագույն օրինակներից նախարարն առանձնացնում է Թռչկանի ջրվեժի եւ Մաշտոցի պուրակի հայտնի դեպքերը։ «Ունեցանք խորհրդարանական ընտրություններ, որոնք թերություններով եւ առավելություններով հանդերձ, ամենաանխոցելին էին։ 2012—2016 թթ. բարեփոխումների մարդակենտրոն ծրագիր է մշակվել, որը համընդգրկուն բնույթ ունի»,— նշեց Թովմասյանը։ Նրա ներկայացմամբ, մեկ առանձին համակարգում փոփոխությունները կամ աննկատ են մնում, կամ այլ համակարգերում նման փոփոխությունների բացակայության հետեւանքով ազդեցություն չեն ունենում։
Առաջին անգամ Հայաստանի պատմության մեջ նախատեսված են բարեփոխումներ՝ իրավաբանական կրթության համակարգում։ Իրավաբանական անձի գրանցման արագությամբ Հայաստանն աշխարհում 4—րդ կամ 5—րդն է։ Թովմասյանը վստահեցրեց, որ շատ ոլորտներում Հայաստանն անգամ առաջ է իր եվրոպացի գործընկերներից, սակայն «կոռուպցիոն ռիսկերից մաքրելու անհրաժեշտություն կա»։ Նախարարը նկատեց, որ նշված փոփոխություններն առաջին հերթին մեզ են անհրաժեշտ։
ԵՄ ներկայացուցիչ Ջոն Քյերը նկատեց, որ ԵՄ տեսակետից ճանաչելի է երկկողմանի իրավական շարժունակությունը։ Նա ցանկություն հայտնեց միգրացիայի ոլորտում համագործակցությունը խորացնելու։ Քյերի համոզմամբ՝ երկկողմանի համագործակցությունը մի շարք ոլորտներում կօգնի բարեփոխումների հասնել։
29-06-2012
|
