Երվանդ Քոչարի տարածական նկարչությունը՝ ֆիլմով

Երվանդ Քոչարի 1927 թ. ստեղծած տարածանկարը «ArtMonaco—Expo 2012» ցուցահանդեսին արժանացել է գլխավոր մրցանակի՝ «Լավագույն ստեղծագործություն» անվանակարգում։ Ցուցահանդեսին ներկայացված են եղել նաեւ Հովհաննես Այվազովսկու, Մարտիրոս Սարյանի, Հակոբ Կոջոյանի ստեղծագործությունները, ինչպես նաեւ ժամանակակից արվեստագետների ստեղծագործություններ։ Գլխավոր մրցանակ ստանալը շարժառիթ դարձավ, որպեսզի պատրաստվի ֆիլմ Երվանդ Քոչարի տարածական նկարչության մասին։
«Երվանդ Քոչար. տարածական նկարչություն» վավերագրական ֆիլմի հեղինակը Ռուբեն Քոչարն է, իսկ առաջնախաղը կկայանա հուլիսի 12—ին՝ «Ոսկե ծիրան» երեւանյան միջազգային կինոփառատոնի շրջանակներում։ Ֆիլմի տեւողությունը 16 րոպե է, նկարահանվել է ՀՀ մշակույթի նախարարության ու Քոչարի թանգարանի համատեղ աջակցությամբ։
Ռ. Քոչարի խոսքով՝ ֆիլմը գաղափարի եւ հայտնագործության մասին է, որն ունի իր պատմական մասը։ «Այնտեղ խոսվում է տարածական հասկացողության մասին, որը դեռ շատ վաղուց ներկայացրել է Երվանդ Քոչարը՝ առաջ անցնելով իր ժամանակից»,–ասել է կինոռեժիսորը լրագրողներին՝ հավելելով, որ Քոչարը եղել է մեր դրոշը, ում ամեն բնագավառում պետք է ներկայացնել։ Նա նշել է, որ այսօր բոլորն ուրախանում են «Մոսկվա» կինոթատրոնի դիմաց արված եռաչափ պատկերով, բայց չէ որ «մենք դրանից դեռ շատ տարիներ առաջ ենք ունեցել նման պատկերներ»։
Երվանդ Քոչարի թանգարանի տնօրեն Լալա Մարտիրոսյան—Քոչարը նկատել է, որ Քոչարին շատերը չեն ճանաչում տարածական նկարչության բնագավառում, իսկ նա դեռ շատ տարիներ առաջ Փարիզում այս բնագավառում արժանացել է մեծ գնահատանքի։ «Նա խոսեց ոչ միայն երեք չափումների մասին՝ բարձրություն, խորություն եւ լայնություն, այլ նաեւ չորրորդ՝ ժամանակի, որը կա Քոչարի նկարներում»,–բացատրել է Լալա Մարտիրոսյանը։
Թանգարանի տնօրենը անդրադարձել է «ArtMonaco—Expo 2012» ցուցահանդեսին՝ տեղեկացնելով, որ մրցանակը հիմնականում տրվում է 20—րդ դարի գեղարվեստական զարգացման ընթացքի վրա նորարարական նշանակալից ներդրում ունեցող ստեղծագործություններին։ «Ցուցահանդեսին մասնակցում էին 99 պատկերասրահ՝ շուրջ 4000 արվեստի գործերով, որոնց թվում էին Պիկասոյի, Բուտերոյի, Մոդիլիանիի եւ աշխարհահռչակ այլ վարպետների ստեղծագործություններ, սակայն մրցանակը հանձնվեց Քոչարի ստեղծագործությանը, որը շատ հատկանշական է մեզ համար»,–ընդգծել է թանգարանի տնօրենը։