Նախատեսվեցին գումարներ հիմնանորոգումների նպատակով

Վանաձորի Հալաբյան եւ Գործարանային փողոցների մեծաթռիչք կամուրջների հիմնանորոգումն իրականացնելու նպատակով համայնքի ավագանին հերթական նիստում հաստատեց ծախսային ծրագրերը։
Վանաձորի 29 կամուրջներից այս երկուսն առավել կարեւոր են ու առավել վթարավտանգ։ Հալաբյան փողոցի եռաթռիչք կամուրջը (երկարությունը՝ 56 մետր) քաղաքի կենտրոնը կապում է Դիմաց եւ Բազում թաղամասերին, կամրջի վրայով անցնում են Գուգարք համայնք, Դիլիջան տանող ճանապարհները, Գործարանային փողոցի թիվ 1 քառաթռիչք կամուրջը միացնում է քաղաքի արդյունաբերական գոտին մյուս հատվածների հետ։ Երկուսն էլ ունեն ռազմավարական նշանակություն ոչ միայն քաղաքի, այլեւ հանրապետության համար։ Դեռ 1988թ. աղետից հետո կատարվել է 14 կամրջի զննման եւ փորձարկման աշխատանք, իսկ 2003 թվականին հիշյալ երկու կամուրջները կրկնակի զննման են ենթարկվել։ Առաջինում արձանագրվել է կրող կառուցվածքների վթարայնության դինամիկ աճ, մյուսում՝ կամրջի ճեղքերի լայնացման միտում։ Երկուսն էլ վաղուց վտանգ են ներկայացնում ինչպես ավտոտրանսպորտի, այնպես էլ հետիոտների համար։ Հաշվարկված է նաեւ նորոգման աշխատանքների նախահաշվային արժեքը, համապատասխանաբար՝ 80 մլն եւ 30 մլն դրամ։ Ավագանին նույն նիստում գումարներ նախատեսեց նաեւ աղետից հետո երբեւէ չնորոգված, ծայրահեղ վատ վիճակում գտնվող թիվ 31 նախակրթարանի եւ ծանրամարտի մասնագիտացված մարզադպրոցի շենքերը նորոգելու նպատակով։

11-07-2012