|
ՀՀ փոխվարչապետն ընդունեց ԱԶԲ—ի փոխնախագահին 
ՀՀ փոխվարչապետ, տարածքային կառավարման նախարար Արմեն Գեւորգյանը երեկ ընդունեց Ասիական զարգացման բանկի (ԱԶԲ) պատվիրակությանը՝ փոխնախագահ Քսիաոու Ժաոյի գլխավորությամբ, հայտնում են ՏԿՆ հասարակայնության հետ կապերի բաժնից։
Հանդիպմանը ներկա էին նաեւ ՀՀ էկոնոմիկայի նախարար Տիգրան Դավթյանը, Հյուսիս—հարավ ճանապարհային միջանցքի ներդրումային ծրագրի իրականացման գրասենյակի գործադիր տնօրեն Արա Հովսեփյանը։
Փոխվարչապետը նշեց, որ հաշվի առնելով «Հյուսիս—հարավ» ավտոմայրուղու կառուցման ծրագրի՝ գործնական փուլին անցումը, նպատակահարմար է ԱԶԲ—ի կողմից ծրագրի իրականացման մասով առավել ներգրավվածություն՝ մասնավորապես որոշումներ կայացնելու առավել արագ մեխանիզմների կիրառում։
ԱԶԲ—ի փոխնախագահ Քսիաոու Ժաոն վստահություն հայտնեց, որ ՀՀ նոր կառավարությունը հստակ պատկերացում եւ կարողություններ ունի իրականացնելու երկրի զարգացման համար անհրաժեշտ ծրագրեր, եւ հայտնեց ԱԶԲ—ի պատրաստակամությունը՝ աջակցել ՀՀ—ի համար կարեւոր նշանակության ծրագրերի իրականացմանը եւ նոր ծրագրերի քննարկմանը։ Մասնավորապես նշվեց արդյունաբերությունում եւ գյուղատնտեսությունում առկա ներուժի մասին։ ԱԶԲ—ի փոխնախագահը կարեւորեց Հայաստանում ընթացող հարկային վարչարարության բարեփոխումների իրականացումը, ինչն առավել նպաստավոր բիզնես միջավայրի ձեւավորման կհանգեցնի։ 18-07-2012
|
