Միջադեպի պատասխանատվությունը ադրբեջանական կողմի ուսերին է

ՀՀ ՊՆ մամուլի քարտուղար Ա. Հովհաննիսյանը մեկնաբանել է ադրբեջանական լրատվամիջոցների տարածած տեղեկությունն այն մասին, որ հայ—ադրբեջանական շփման գծի հյուսիս–արեւելյան հատվածում՝ Այգեձոր գյուղի մերձակայքում, չեզոք գոտում հայտնաբերվել է ադրբեջանական բանակի զինվոր Օրուջով Էլչին Ռագուֆ Օղլուի դիակը, հայտնում են ՀՀ ՊՆ տեղեկատվության եւ հասարակայնության հետ կապերի վարչությունից։
–Սա ադրբեջանական կողմի հերթական արկածախնդրության հետեւանքն է։ Եվ փաստը, որ ադրբեջանցի զինծառայողը հայտնվել է մեր դիրքապահների հսկողության գոտում, վկայում է հենց այդ մասին։ Հայ դիրքապահների զգոնության շնորհիվ ադրբեջանական զինվորական ղեկավարության, կամ, ինչու չէ, անհատ զինծառայողի ձեռնակած այս սադրանքը եւս ձախողվել է։ Սահմանախախտը մեր դիրքապահների կողմից հայտնաբերվել եւ թիրախավորվել է։ Ըստ երեւույթին, վերջինս վիրավորվել է հայ դիրքապահների ձեռնարկած գործողությունների արդյունքում եւ փորձել է նահանջել սեփական դիրքեր, սակայն չի կարողացել դուրս գալ չեզոք գոտուց։ Ամեն դեպքում այս միջադեպի պատասխանատվությունն ամբողջովին կրում է հարեւան երկրի ռազմական գերատեսչությունը։

19-07-2012