Զոհվել է երկրի պաշտպանության նախարարը

Դամասկոսի կենտրոնում՝ ազգային անվտանգության շենքի մոտակայքում, որտեղ այդ ժամանակ ընթանում էր կառավարության անդամների եւ նախարարների հանդիպումը, ուժգին պայթյուն է որոտացել։ Ահաբեկչության հետեւանքով զոհվել են Սիրիայի պաշտպանության նախարար Դաուդ Աբդ Ալլահ Ռաջհանը եւ պաշտպանության փոխնախարար, նախագահ Ասադի աներորդի Աասիֆ Շաուքաթը, շատ բարձրաստիճան պաշտոնյաներ էլ ծանր վիրավորվել են։
Իսկ տեղեկությունները ներքին գործերի նախարարի եւ հետախուզության ղեկավարի մահվան մասին հերքվել են։ Ահաբեկչության հետեւանքով նրանք վիրավորվել են։
Ինչպես տեղեկացնում է «Associated Press»—ը՝ պայթյունն իրականացրել է մահապարտ ահաբեկիչը։ Մահապարտը կարողացել էր մուտք գործել անվտանգության ծառայության տեղական մասնաճյուղերից մեկի գրասենյակ, որտեղ ընթանում էր հանդիպումը։
Պայթյունից հետո բոլոր վիրավորներին անհապաղ տեղափոխել են «Շամի» ռազմական հոսպիտալ, որը պաշտպանության տակ է վերցվել Ազգային գվարդիայի կողմից։
Սիրիայի նախագահ Բաշար ալ Ասադն անվտանգության շենքի մոտակայքում տեղի ունեցած ահաբեկչությունից եւ պաշտպանության նախարարի զոհվելու վերաբերյալ տեղեկություն ստանալուց հետո հրաման է արձակել Ֆահադ Ջասիմ ալ Ֆարիջին նշանակել զինված ուժերի գլխավոր հրամանատար եւ պաշտպանության նախարար։
Դամասկոսում տեղի ունեցած ահաբեկչությունից հետո Ռուսաստանի արտաքին գործերի նախարար Սերգեյ Լավրովը նշել է, որ Սիրիայում ընթանում է որոշիչ պայքար։ Նախարարը զգուշացրել է, որ ՄԱԿ—ի Անվտանգության խորհրդի կողմից Սիրիայի դեմ պատժամիջոցներ կիրառելը կնշանակի աջակցել ընդդիմությանը, որն էլ երկիրը կմոտեցնի քաղաքացիական պատերազմի։
Ինչպես հաղորդում է «Արմենպրեսը»՝ վկայակոչելով արաբական լրատվամիջոցները, արդեն տեղեկություններ են ստացվել այն մասին, որ Դամասկոսում տեղի ունեցած ահաբեկչության պատասխանատվությունն իրենց վրա են վերցրել Սիրիայի ազատ բանակի անդամները, ինչպես նաեւ իսլամիստական «Լիվա ալ Իսլամ» խմբավորումները։
Ընդդիմադիրների մամլո քարտուղարը հայտնել է, որ սա այն էր, ինչի մասին իրենք արդեն զգուշացրել էին։ Հղումը հայտնվել է «Լիվա ալ Իսլամ» ֆեյսբուքյան էջում։
Մահապարտ—ահաբեկիչն, ամենայն հավանականությամբ, թիկնապահ էր նախագահ Ասադի կողմնակիցների մոտ։
Երեկ Մոսկվայում տեղի է ունեցել Թուրքիայի վարչապետ Ռեջեբ Թայիբ Էրդողանի հանդիպումը ՌԴ նախագահ Վլադիմիր Պուտինի հետ։ 2,5 ժամ տեւած հանդիպման ընթացքում քննարկման հիմնական թեման հանդիսացել է Սիրիայում տիրող իրավիճակը։ Քննարկվել է նաեւ Սիրիայի տարածքային ջրերում թուրքական RF—4 ռազմական հետախուզական ինքնաթիռի կործանման միջադեպը, որի ժամանակ Էրդողանը ծանոթացել է այդ դեպքի վերաբերյալ ռուսական կողմի մոտ առկա հետախուզական տվյալներին։