Օրակարգում ցեղասպանության վերաբերյալ օրինագծի հարցն է

«Ժխտողական քաղաքականությունը վնաս է հասցնում Ֆրանսիայի քաղաքացիներին։ Հայոց ցեղասպանության ժխտումը առնչվում է մեր հանրապետությունում հավասարության արժեքի իրացմանը։
Առնվազն այսօր հայկական ծագմամբ Ֆրանսիայի քաղաքացիները չպետք է շարունակեն հետապնդվել Թուրքիայի կողմից»,–ֆրանսիական «Le Parisien»—ի հաղորդմամբ, նման հայտարարությամբ հանդես է եկել ընդդիմադիր «Միություն հանուն ժողովրդական շարժման» կուսակցության անդամ, Ֆրանսիայի Ազգային ժողովի պատգամավոր Պատրիկ Դեւեջյանը։
Նա ասել է, որ Ֆրանսիան չի կարող թույլ տալ, որ մի օտար պետություն իր ժխտողական քարոզչությունը տարածի ֆրանսիական հողում։
Պատգամավորն իր լիակատար աջակցությունն է հայտնել Ֆրանսիայի նախագահ Ֆրանսուա Օլանդի նախաձեռնությանը՝ Ֆրանսիայի խորհրդարանին Հայոց ցեղասպանության ժխտումը քրեականացնող նոր օրինագիծ առաջարկելու հարցում՝ նշելով, որ նման օրինագիծն առնչվում է ոչ թե հիշողությանը, այլ՝ ներկային։
Հուլիսի 24—25—ը Փարիզում կլինի արտգործնախարար Էդվարդ Նալբանդյանը, ուր նախատեսված են նրա հանդիպումները Ֆրանսիայի ԱԳ նախարար Լորան Ֆաբիուսի եւ պաշտոնատար այլ անձանց հետ (մինչ այդ Էդ. Նալբանդյանը Բրյուսելում մասնակցել է Արեւելյան գործընկերության անդամ երկրների արտգործնախարարների հանդիպմանը)։
Իսկ այս ամսվա ընթացքում նախատեսվում է նախագահ Օլանդի հանդիպումը Ֆրանսիայի հայ համայնքի ներկայացուցիչների հետ. ՀՅԴ Հայ դատի Ֆրանսիայի գրասենյակի ատենապետ Հրաչ Վարժապետյանի տեղեկացմամբ, այն, հավանաբար, տեղի կունենա մինչեւ հուլիսի 31—ը։
«Արմենպրեսի» հետ զրույցում Վարժապետյանը մանրամասնել է, որ նախագահի հետ հանդիպմանը քննարկվելու է միայն մեկ հարց՝ ցեղասպանության ժխտումը քրեականացնող օրինագիծը եւս մեկ անգամ խորհրդարան բերելու վերաբերյալ. «Օլանդը տասն օր առաջ մեկ անգամ եւս վերահաստատեց, որ հոկտեմբեր—նոյեմբեր ամիսներին այս օրինագիծը պետք է ներկայացվի Ազգային ժողովին»։
Անդրադառնալով այն լուրերին, թե Օլանդը չի պատրաստվում պահել իր նախընտրական խոստումը, Վարժապետյանը կարծիք է հայտնել, որ այդ ամենը ընդամենը թուրքական մամուլի ձեռքի գործն է. «Մենք շարունակում ենք մնալ վճռական եւ համոզված, որ Ֆրանսուա Օլանդն իրականացնելու է նախընտրական իր խոստումը, եւ վաղ թե ուշ այդ օրինագիծը Ֆրանսիայի Հանրապետության տարածքում վերածվելու է օրենքի»։
Օրերս Հայաստանում Ֆրանսիայի արտակարգ եւ լիազոր դեսպան Անրի Ռենոն այս հարցի շուրջ տված իր մեկնաբանությունում շեշտեց, որ Ֆրանսիայի նախագահության մակարդակով պաշտոնապես հայտարարվել է՝ երկրի նախագահը հավատարիմ է մնալու իր տված խոստմանը, որպեսզի Հայոց ցեղասպանությունը քրեականացնող օրինագիծը դրվի շրջանառության մեջ. «Ելիսեյան պալատում այսօր մտորում, խորհում են՝ ինչ միջոցներով, ինչպես կարելի է անդրադառնալ այս հարցին»։

Ալլա ՍԵՐՈԲՅԱՆ