ՀԳՀՄ—ն պատրաստակամ է աջակցել

Հայաստանի գործատուների հանրապետական միությունը (ՀԳՀՄ) հանդես է եկել հայտարարությամբ, որով պատարաստակամություն է հայտնել աջակցել Սիրիայից Հայաստան տեղափոխվող եւ հայրենիքում բիզնես հիմնելու գործում։ Ինչպես հաղորդում է «Արմենպրեսը», հայտարարության մեջ մասնավորապես ասվում է. «Հայաստանի գործատուների հանրապետական միությունն (ՀԳՀՄ) անհանգստացած է Սիրիայի քաղաքական իրավիճակի հետեւանքով մեծ վտանգի առջեւ հայտնված հայկական գաղութի իր բազմահազար հայրենակիցների ճակատագրով։
Հայերը, ովքեր հաջողությամբ ինտեգրվել են համաշխարհային քաղաքակրթության օրրաններից մեկը հանդիսացող երկրի սոցիալ—տնտեսական ընդհանուր միջավայրին՝ պահպանելով սեփական մշակութային եւ ազգային ուրույն նկարագիրը, նախաձեռնելու եւ ստեղծագործ աշխատանքով զբաղվելու հնարավորությունները, միշտ էլ իրենց երկրորդ հայրենիքը դարձած արաբական այդ երկրում ապրել են որպես լիիրավ քաղաքացիներ։
Դրա վառ ապացույցն է նաեւ այն, որ բազմաթիվ սիրիահայ ձեռներեցներ այստեղ հիմնել են բիզնես՝ մեծ, միջին կամ փոքր ձեռնարկություններ, ազնվորեն ներդրել են իրենց հասանելիք մասնաբաժինը Սիրիայի գործարար միջավայրի զարգացման գործում, նաեւ երկրի ներսում եւ նրա սահմաններից դուրս իրականացնում են տնտեսական համագործակցության եւ կոոպերացիայի բազմազան նախաձեռնություններ։
Ցավոք, այսօր իրավիճակը այլ է։ Գործարար միջավայրը Սիրիայում խաթարվել է, դարձել անհուսալի եւ ռիսկային։ Կան մարդիկ, որոնք ծրագրեր են կազմում իրենց գործը երկրի սահմաններից դուրս տեղափոխելու համար։
Նկատի ունենալով եւ լավ հասկանալով գաղափարներ, ջանք, եռանդ, ֆինանսական միջոցներ եւ նյութական արժեքներ ներդնող, բիզնես հիմնող գործարար մարդկանց մտահոգությունները, որ կարող է առաջանալ Սիրիայում ստեղծված ներկա կացության հետեւանքով, ՀԳՀՄ—ն հանդես է գալիս նրանց ուղղված առաջարկությամբ։
Հարգելի հայրենակիցներ, այն գործարարները, ովքեր Սիրիայում տիրող անբարենպաստ իրավիճակի պատճառով մտադիր են տեղափոխվել Հայաստան եւ շարունակել նախասիրած գործունեությունը կամ հիմնել նոր բիզնես, ՀԳՀՄ—ն պատրաստ է իր բոլոր հնարավորություններով սատարել եւ աջակցել»։

28-07-2012