|
«Նարցիսը» սիրո ծնունդ է Պարգեւներ՝ ամսագրի մեկենաս Նուբար Ջանոյանին եւ մրցանակակիրներին
«Նարցիս» գրական—գեղարվեստական եւ մշակութային հանդեսը բոլորեց իր 7—ամյակը, եւ գրական մեծ տոնի վերածվեց Երեւանի Կոմիտասի անվան կամերային երաժշտության տանը երեկ նրան նվիրված հանդիսությունը՝ ներկայությամբ ՀՀ ԱԺ փոխնախագահ Հերմինե Նաղդալյանի, ԱԺ պատգամավորների, ազգային բարերար Վահագն Հովնանյանի, ՀԳՄ նախագահ Լեւոն Անանյանի, գրականության եւ արվեստի շատ գործիչների ու ընթերցողների։ Հանդեսի անցած ուղու մասին խոսք ասաց փոխխմբագիր, բանաստեղծ Արտաշես Արամը, ըստ որի՝ ամսագրի ստեղծման մեջ մեծ է նրա մեկենաս Նուբար Ջանոյանի եւ նրա կնոջ՝ հանդեսի տնօրեն, բանաստեղծ Սոնա Վանի դերը։
«Օրերից մի օր նրանք Հայաստան եկան ոչ թե որպես զբոսաշրջիկ, այլ եկան հայրենիք՝ ազգային ձգտումների իրականացման նպատակով։ Նուբար Ջանոյան հայը, ազգային գործիչը, բարերարը, բժիշկը եւ Սոնա Վանը իրենց այցը նշանավորեցին մի այնպիսի երեւույթով, որը կոչվեց «Նարցիս» հանդեսի ծնունդ, որն ստեղծման օրից համախմբեց իր շուրջը այսօրվա մեր գրական դաշտում գտնվող ամենաչարքաշներին ու ամենանվիրյալներին։ Այդ նվիրյալներին անցած ամբողջ տարիներին առաջնորդել են նրանց նման նվիրյալներ՝ գլխավոր խմբագիր Վահան Վարդանյանը եւ փոխխմբագիր Շանթ Մկրտչյանը»։
Այնուհետեւ հանդես եկավ ՀՀ սփյուռքի նախարար Հրանուշ Հակոբյանը՝ նշելով այն մեծ աշխատանքը, որ կատարել են ամերիկահայ բարարար ամուսինները, մասնավորապես, խոսեց նաեւ Նուբար Ջանոյանի այն բժշկական հիմնարկի մասին, որն անվճար բուժում է ճակատագրի քմահաճույքով Հայաստանից ԱՄՆ ընկած բուժման կարիք ունեցող հայրենակիցներին։ Տիկին Հակոբյանը ամսագրի մեկենասին պարգեւատրեց նախարարության բարձրագույն պարգեւով՝ ոսկե մեդալով։
ՀՀ մշակույթի նախարարության վարչության պետ Սեյրանուհի Գեղամյանը հյուրին հանձնեց նախարարության պատվոգիր եւ «Նարեկացի» հուշամեդալ, ինչպես նաեւ պատվոգրով պարգեւատրեց Վահան Վարդանյանին։
Պարգեւներ հանձնվեցին նաեւ Մեսրոպ Մաշտոցի անվան Մատենադարանի եւ ԱՕԿՍ— կողմից։
Այնուհետեւ մրցանակակրի վկայագրեր հանձնվեցին հանդեսի աչքի ընկած հեղինակներին, ովքեր ստեղծագործում են Երեւանում եւ մարզերում։ Երեկոն նշանավորվեց նաեւ հանդեսի ստեղծագործողների գրքերի շնորհանդեսով, որոնց թվում էր Նուբար Ջանոյանի «Ճամփորդություն ժամանակի եւ տարածության միջով» փաստագրական պատմվածքների ստվար ժողովածուն։
Վանիկ ՍԱՆԹՐՅԱՆ 28-07-2012
|
