Հանրապետություն
Հասարակություն
Ներքին կյանք
Արտաքին քաղաքականություն
Տնտեսություն
Սոցիում
Մշակույթ
Գիտություն
Կրթություն
Առողջապահություն
 
Պաշտոնական
Նախագահ
Ազգային ժողով
Կառավարություն
ԱԳՆ
ՊՆ
Մայր Աթոռ
Այլք...
 
Երևան
Մարզեր
ԼՂՀ
Աշխարհ
Զանազան

27.02.2020
ՄԱՐԶԵՐ


«Հեքիաթի տունը» բացեց դռները

Այն խրախուսելու է զբոսաշրջությունը եւ էթնոմշակույթը

Սա, իհարկե, դեռ Լոռու ձորը չէ։ Լոռու ձորը քիչ ներքեւում է, այնտեղ, որտեղ մեր աչքի առաջ կհառնեն ահռելի, երկնքից կախված, խորունկ նոթերը կիտած, համառ ու անթարթ հայացքով իրար նայող ժայռերը, որոնց ոտքերի տակ գալարվում է գիժ Դեբեդը մոլի, խելագար թռչում քարերի գլխով, փրփուր է թքում անզուսպ երախով... Սա դեռ այն հատվածը չէ, որտեղ «էս տախտի վրա աղոթում մի վանք, էն ժայռի գլխին հսկում է մի բերդ...»։ Սա նախադուռն է ձորի, որտեղ ժայռերի փոխարեն անտառապատ բարձր սարեր են՝ իրար այնքան մոտ կանգնած, որ նրանց արանքով միայն մի Դեբեդ ու մի նեղ ավտոճանապարհ կարող են անցնել՝ տեղ—տեղ հերթը իրար զիջելով։ Այս զմրուխտ հեքիաթի մեջ էլ, Փամբալ գյուղում ծվարել է Լոռվա «Հեքիաթի տունը»։ Հենց այդպես՝ «Հեքիաթի տունը»։
Այս կառույցի լույս աշխարհ գալը կապված է «Ինտեգրված գյուղական զբոսաշրջության զարգացում» ծրագրի հետ, որի նախաձեռնողը ՄԱԿ—ի Զարգացման ծրագիրն է, իսկ ֆինանսավորողը՝ ՌԴ կառավարությունը։ Լոռու մարզում զբոսաշրջության զարգացման հեռանկարով է ստեղծվել այս մշակութային օջախը, որպես զբոսաշրջային կարեւոր հանգրվան։
Այդ առիթով ՄԱԿ—ի ՄԱԶԾ Հայաստանում մշտական ներկայացուցչի տեղակալ Դմիտրի Մարիասինը հետեւյալն ասաց. «Անձամբ ես, որպես երկու երեխայի ծնող, մեծ հույս ունեմ, որ այն կդառնա իրոք հեքիաթային վայր ոչ միայն տեղացիների, այլեւ զբոսաշրջիկների համար։ Մեր նպատակն է Հայաստանի քարտեզի վրա կայուն տնտեսական միավորներով 50—60 կետ ստեղծելը, որից մի քանիսը լինելու են Լոռիում»։ Պարոն Մարիասինը «Հեքիաթի տան» բացմանը եկել էր իր տիկնոջ եւ երեխաների հետ, ինչը վկայում է նրա խոսքի անկեղծության մասին։ Շինարարական աշխատանքները սկսվել են անցած տարվա վերջին։ Ճիշտ է՝ կառույցը դեռեւս ամբողջությամբ ավարտված չէ, բայց այդ վիճակով արդեն գործում է։ «Հայաստանը խաղաղության խաչմերուկում» 7—րդ միջազգային ֆոլկլորի փառատոնի (սեպտեմբերի 8—12) շրջանակում այստեղ հյուրնկալվել էին Լիտվայի, Վրաստանի, Իրանի եւ Հայաստանի (Լեռնապատ գյուղի) ֆոլկլորային խմբերը։
«Հեքիաթի տան» տիրուհին՝ «Ավանդական տոների վերածնունդ» կրթամշակութային ՀԿ նախագահ Հասմիկ Բաղրամյանը կարծես թե զարմացավ իմ հարցից՝ ինչո՞ւ հեքիաթի տուն. «Որովհետեւ Լոռվա մարզում բնությունն ինքնին հեքիաթային է, կարծես օդի մեջ հեքիաթը կա։ Ամեն մի լոռեցի հեքիաթ կպատմի, լոռեցու խոսքի մեջ անպայման հեքիաթային մի դրվագ կա. «Ոնց որ ասում էր մեր մեծը...»։ Հեքիաթը Լոռիում շատ տարածված է, եւ այս Տան նպատակը Լոռվա մարզի մշակութային ժառանգության վերականգնումն է ի դեմս հեքիաթի։ Իհարկե, այստեղ պետք է ներկայացվեն կենցաղը, կենցաղային արարողությունները՝ որպես մշակույթի մաս, Լոռվա բոքոնը, պանիրը, մեղրը, որոնք յուրահատուկ համ ունեն եւ անուն։ Դա պետք է գեղեցիկ ներկայացվի որպես մշակութային ժառանգության գանձ։ Գալիս են ոչ թե կշտանալու համար, այլ առնչվելու տվյալ արարողությանը, որը հազարամյակների պատմություն ունի։ Դրա հետ մեկտեղ պետք է ներկայացվեն հեքիաթներ, ոչ միայն հայկական, այլեւ աշխարհի տարբեր ժողովուրդների, որովհետեւ այսօր հեքիաթի աշխարհը մեռնում է։ Մեռնում է ոչ միայն Հայաստանում, այլեւ ամբողջ աշխարհում։ Կա այդպիսի վտանգ. այսօր երեխաները կտրված են հեքիաթից»։ Տանտիրուհին խոստովանում է, որ «Հեքիաթի տունը» չնայած ստեղծվել է զբոսաշրջությունը մարզում ավելի գրավիչ եւ հետաքրքիր դարձնելու նպատակով, սակայն իրողության խորքում առկա է առավել մեծարժեք նպատակը՝ մշակութային ժառանգության վերականգնումը։
Հասմիկ Բաղրամյանը, որի ղեկավարած հասարակական կազմակերպությունը մշակութային այսպիսի կառույցներ ունի նաեւ Հայաստանի այլ շրջաններում՝ Բյուրականում, Քանաքեռում, Աշտարակում, այս կառույցը անվանում է «Հեքիաթի տուն թանգարան—թատրոն»։ Նման կառույցների դերն ու նշանակությունը մեծ է ու գնալով ավելի է մեծանալու, քանի որ դրանք միտված են ֆոլկլորային մշակույթը կործանումից փրկելուն։ Առաջին այսպիսի կառույցը ստեղծվել է անցյալ դարի սկզբին Շվեդիայում։ Այնտեղ հասկացել են, որ տեխնոլոգիաների արագ զարգացումը բերում է ժողովրդական մշակույթի մահվան, եւ ձեռնարկել են նման թանգարանների կառուցումը։ Հասմիկ Բաղրամյանն առավել վատ միտումներ է տեսնում հայ ժողովրդական մշակույթի դաշտում։ Ըստ նրա, այն, ինչ այսօր հեռուստաեթերում ներկայացվում է որպես մշակույթ, միայն վնասում է մեր մշակույթը, նպաստում, որ ավելի արագ կորցնենք մեր իսկական ազգային արժեքները։ «Եթե դրա դեմ ինչ—որ միջոց չձեռնարկենք, վաղն ունենալու ենք ապազգային ռաբիզ մի բան»,–ասում է նա։
«Կուզենայի, որ այս կենտրոնում միշտ լիներ ինչ—որ միջոցառում, որի համար առնում են տոմս ու գալիս են դիտելու, ինչպես նորմալ թատրոններում եւ թանգարաններում։ Ախր սա առաջին հերթին մեր ժողովրդին է պետք, ոչ թե զբոսաշրջիկին։ Գիտեք, Լիտվայում ինչ են արել. մի ընդարձակ տարածք որպես էթնոգոտի այնպես են ըստ ժողովրդական կենցաղի ու մշակույթի ձեւավորել, որ դրանցով անցնելուց հետո քեզ թվում է՝ ամբողջ Լիտվան ես տեսել՝ ժողովրդական մշակույթի իր բոլոր երանգներով։ Երկիրը մեծ ներդրումներ է անում այդ ոլորտում, շատ է արժեւորում իր մշակույթը։ Իսկ մեզ մոտ...»,–նշեց ՀԿ—ի նախագահը։
Հասմիկը ուսանել է Իտալիայի Սանտա Չիչիլիա ակադեմիայում (հնագույն երաժշտության), որտեղ էլ հղացել է հայ ֆոլկլորային երաժշտության եւ մշակույթի կենտրոններ հիմնելու գաղափարը։ Նա այն համոզմունքին է, որ ունենալը քիչ է, հարկավոր է ներկայացնել այն։ Այդ մտքի վրա մի օրինակ է բերում. «Իտալիայում գտնվելու ժամանակ Թուրքիան ներկայացրեց Վասպուրականի ֆոլկլորային մշակույթը, ամբողջությամբ հայկական։ Մեծ ցնծությամբ ընդունվեց ներկայացվածը։ Ես որքան էլ սրան—նրան ասում էի, որ սա հայկական ֆոլկլորն է, լսող չկար։ Այնպես որ սեփական մշակույթը պետք է կարողանալ ներկայացնել եւ նախանձախնդիր լինել էթնիկ մշակույթի պահպանման նկատմամբ»։
Հանդիսավոր միջոցառումը հարստացրին միջազգային փառատոնի մասնակից էթնոխմբերն իրենց ներկայացումներով։ Իհարկե, տիրոջ իրավունքով «խոսեցին» նաեւ Մեծ լոռեցու հեքիաթային հերոսները։
Պետրոս ՍԱՐՈՒԽԱՆՅԱՆ

12-09-2018





27-02-2020
Հայրենի բնաշխարհին վնաս հասցնողը չի կարող հայրենասեր լինել
Բնությունը սիրել սովորում են տանը, դպրոցում, բակում, բնության ...


27-02-2020
Բոլորը հասկացել են, որ վատ աշխատանքը չի ընդունվելու
Արարատի մարզպետը՝ ասֆալտապատող ընկերությունների մասին

Արարատի մարզում առկա ...


27-02-2020
Հայաստանի ազգային հերոս
Հովհաննես Չեքիջյան

«Եթե ես մոտենում եմ խմբին, խմբի ...


27-02-2020
Արցախը գլոբալ քաղաքական գործոն է
Բանակցությունների ձեւաչափը եռակողմ է

«ՀՀ»-ի հարցազրույցը քաղաքագետ, պրոֆեսոր ...


27-02-2020
Որտեղից ինչքան բենզին ու դիզվառելիք ենք ներկրում
Եվ ովքեր են շուկայի «խաղացողները»

Արմենուհի ՄԵԼՔՈՆՅԱՆ
a.melqonyan@hhpress.am


2017 թ. ...


27-02-2020
Տերյանը եւ քրիստոնեությունը
«Անդարձ կորել է սրտիս խնդումը...»

Թադեւոս ԽԱՉԱՏՐՅԱՆ
t.khachatryan@hhpress.am


Երեք դեպքում ...


27-02-2020
Դպրոցներում միայն «թուղթ են ստուգել»
Որքանո՞վ է վստահելի տեսչական մարմնի գործունեությունը

Լիանա ՍԱՐԳՍՅԱՆ
l.sargsyan@hhpress.am


Կրթության ...



27-02-2020
«Ուզում էինք ավելի լավ արդյունք, բայց ստացվեց ինչպես միշտ»
Պոլիկլինիկաներում էլեկտրոնային ...

27-02-2020
Բաքուն չի կարող խուսափել պատասխանատվությունից
Ադրբեջանում հայերի ցեղասպանությունն ...

27-02-2020
Իրանը կրկին հայտնվել է FATF-ի «սեւ ցուցակում»
Էմմա ԲԵԳԻՋԱՆՅԱՆ
e.begijanyan@hhpress.am



27-02-2020
Դեբեդի կիրճը
Զբոսաշրջության ամենագրավիչ վայրերից ...
USD
EURO
RUR
GEL
Եղանակը Երևանում
գիշերը -1... -3
ցերեկը 0... +2

Մեր մասին
Կապ
   Արխիվ

© 2006 Copyright Hayastany Hanrapetutyun daily © 2006 Design and development by WEBMAKER STUDIO