ՊՆ բեռնատարի վթարի գործով հանձնախումբը եզրակացություն կտա

Նոյեմբերի 7-ին Գորիս-Որոտան ավտոճանապարհի 39-րդ կմ հատվածում ՊՆ բեռնատար էր շրջվել։ Ցավոք, 4 զինվոր կորցրինք։ Նրանց մահվան պատճառ դարձած վթարի փաստով ծառայողական քննությանը զուգահեռ նախաքննություն է ընթանում։ Պաշտպանության նախարարի պաշտոնակատար Դավիթ Տոնոյանը նշել էր, որ ծառայողական քննության նախնական արդյունքներով արդեն ակնհայտ է, որ ողբերգության պատճառների շարքում տեղ են գտել տեխնիկական ու ծառայության կազմակերպման հետ կապված մի շարք կոպիտ բացթողումներ։
Ովքե՞ր են մեղավորները։ Կառավարության երեկվա նիստից հետո հարցին ի պատասխան պաշտպանության փոխնախարար Գաբրիել Բալայանը նկատեց, որ տարբեր կոչում ունեցող զինծառայողների կողմից եղել են բացթողումներ, եւ հիմա հատուկ հանձնախումբ է աշխատում։ Պաշտպանության փոխնախարարն ասաց նաեւ, որ ներգրավվել են բոլոր ուժերը, որպեսզի այլեւս նման դեպքեր չլինեն։
Ի՞նչ խախտումների ու բացթողումների մասին է խոսքը։ «Եղել են որոշակի տեխնիկական կանոնների խախտումներ, հնարավոր է, որոշ անսարքություններ ի հայտ գան»,—պարզաբանեց Գ. Բալայանը։
Արգելակների չաշխատելու տեղեկություն է շրջանառվում։ Իրականությանը համապատասխանո՞ւմ է։ Փոխնախարարի խոսքերով՝ դա քննարկվող վարկածներից մեկն է, բայց հանձնախումբը դեռ եզրակացություն չի տվել։
Թյուրըմբռնումների տեղիք չտալու համար Գ. Բալայանը խոսեց այն մասին, որ ինչպես է ընդհանրապես զինծառայողը դառնում վարորդ։ Ըստ այդմ՝ դա չի լինում հրամանատարի ցանկությամբ։ Մինչ նրանց զորակոչվելը, զինծառայողները որոշակի պատրաստվածություն են անցնում ՊՆ պատվերով ու ըստ ներկայացրած հայտի։ «Մենք ընդունում ենք պատրաստված վարորդների»,–նշեց նա՝ միաժամանակ հավելելով՝ եթե պարզվի, որ վարորդի մեղքով է վթարը եղել, ուրեմն անհրաժեշտություն կառաջանա վերանայել ՊՆ ծրագրերը։ Բայց փոխնախարարը հավելեց, որ վարորդը բավականին հմուտ է եղել. «Նրա ծառայությունը մոտենում էր ավարտին, մի քանի ամիս հետո զորացրվելու էր»։

Ադրբեջանական մամուլում գերիների փոխանակման մասին տեղեկություն էր տարածվել։ Երեկ մեր պաշտպանության փոխնախարարից պարզաբանում խնդրեցինք։ Գաբրիել Բալայանը հստակեցրեց. «Ո՛չ Հայաստանում, ո՛չ Արցախում ոչ մի ռազմագերի գոյություն չունի։ Մենք բավականին բաց ենք աշխատում»։ Հետո նկատեց. ադրբեջանական կողմի հայտարարություններն ուղղված են ներքին, ինչ-որ չափով նաեւ արտաքին շահառուներին, դրանք որեւէ հիմնավորում չունեն, սուտ են։ Որովհետեւ իրավակիրառ պրակտիկայում նման առաջարկները ՊՆ գալիս են հիմնականում Կարմիր խաչի խողովակներով։ Իսկ ՊՆ-ն նման առաջարկ չի ստացել։