Հանրապետություն
Հասարակություն
Ներքին կյանք
Արտաքին քաղաքականություն
Տնտեսություն
Սոցիում
Մշակույթ
Գիտություն
Կրթություն
Առողջապահություն
 
Պաշտոնական
Նախագահ
Ազգային ժողով
Կառավարություն
ԱԳՆ
ՊՆ
Մայր Աթոռ
Այլք...
 
Երևան
Մարզեր
ԼՂՀ
Աշխարհ
Զանազան

20.03.2019
ԿԱՌԱՎԱՐՈՒԹՅՈՒՆ


Հայրենիքին նվիրված ծառայություն

Ընդունելություն՝ նվիրված Դիվանագետի օրվան

Վարչապետ Նիկոլ Փաշինյանը Հայաստանի ազգային պատկերասրահում ներկա է գտնվել Դիվանագետի օրվա կապակցությամբ հրավիրված ընդունելությանը։
Շնորհավորելով դիվանագետներին տոնական օրվա առիթվ՝ Նիկոլ Փաշինյանը, մասնավորապես, նշել է.
«Ազգային ժողովի մեծարգո՛ նախագահ,
Կառավարության հարգելի՛ անդամներ,
Արտաքին գործերի հարգելի՛ նախարար,
Հարգելի՛ դիվանագետներ,
Պետական այրե՛ր,
Հայաստանում հավատարմագրված դիվանագիտական կորպուսի հարգելի՛ ներկայացուցիչներ,
Շնորհավորում եմ Դիվանագետի օրվա կապակցությամբ։ Սա իսկապես կարեւոր օր է մեր պետության համար։ Թույլ տվեք արձանագրել, որ հերթական այս օրը մեր դիվանագիտական համակարգը դիմավորում է բոլորովին այլ պայմաններում եւ այլ իրավիճակում։ Այսօր բարեբախտաբար մեր դիվանագետներն ամբողջ աշխարհում կարիք չունեն երկար օրեր ու ժամանակ ծախսել տարբեր երկրներում բացատրություններ տալու, թե ընտրությունները քանի տոկոսով են կեղծվել, մյուս ընտրությունները քանի տոկոսով չեն կեղծվի, այս ընտրությունները քանի քայլ էին առաջ, քանի քայլ հետ, ով, որտեղ, որ անկյունում՝ ո՞ւմ, ինչի՞ համար գնդակահարեց։ Սա, կարծում եմ, կարեւոր փոփոխություն է, որն արտահայտում է Հայաստանում տեղի ունեցած ոչ բռնի, թավշյա, ժողովրդական հեղափոխության էությունը։
Իմ հույսն այն է, որ այս փոփոխությունը ոչ թե կընկալվի որպես ավելի պակաս աշխատելու, այլ հակառակը՝ ավելի շատ, ավելի ոգեւորված, ավելի մեծ եռանդով աշխատելու հրամայական, որվհետեւ այսօր Հայաստանի Հանրապետությունն աշխարհին ներկայացնելու բան ունի, եւ այսօր Հայաստանի Հանրապետությանը լսելու ցանկությունը շատ ավելի մեծ է աշխարհի բոլոր կողմերում։
Եվ շատ կարեւոր է արձանագրել այն կարեւորագույն փոփոխությունը, որ տեղի է ունենում հիմա Հայաստանում՝ կառավարման բոլոր համակարգերում, այդ թվում դիվանագետների շրջանում, որ պետք է տեղի ունենա, եւ մենք պետք է արձանագրենք, որ ինչպես ամբողջ կառավարությունը, այնպես էլ դիվանագետները ծառայում են ոչ թե կոնկրետ անձի, ոչ թե կոնկրետ իշխանության, այլ ծառայում են ժողովրդին։ Այս առումով նույնպես մենք ուրիշ իրավիճակում ենք Հայաստանի Հանրապետությունում, որովհետեւ իշխանությունը ձեւավորված է ժողովրդի ազատ կամարտահայտման միջոցով։
Վարչապետ ընտրվելով՝ հենց առաջին օրվանից ես առաջնորդվել եմ այն կանխավարկածով, որ դիվանագետները, դիվանագիտական համակարգը մեր երկրում ամենակայացած պետական համակարգերից է, եւ մենք ամեն ինչ արել ենք, որպեսզի համակարգն իր կայունությունը, բնականոն գործունեությունն ապահովի։ Այս պայմաններում, բնականաբար, ակնկալում եմ, որ Հայաստանի դիվանագիտական ներկայացուցիչները, ընդհանրապես ողջ դիվանագիտական համակարգը պատշաճ ձեւով ամբողջ աշխարհում ներկայացնի Հայաստանում տեղի ունեցած փոփոխությունները եւ համոզված եմ, որ պատշաճ մակարդակով համակարգը կծառայի Հայաստանի Հանրապետությանը եւ նրա ժողովրդին։
Եվ բոլոր դիվանագետները, ովքեր բաց են թողել քաղաքական հեղափոխությանը մասնակցելու պատեհությունը, այսօր լավ առիթ ունեն մասնակցելու տնտեսական հեղափոխությանը, լինել տնտեսական հեղափոխության ակտիվիստ՝ բառիս աշխատանքային իմաստով, այսինքն ամբողջ աշխարհում դառնալ Հայաստանի Հանրապետության եւ Հայաստանի Հանրապետությունում տեղի ունեցող փոփոխությունների եւ դրանց բովանդակության ներկայացման դեսպանը։
Այս առումով, շատ կարեւոր եմ համարում նաեւ Լեռնային Ղարաբաղի հարցում մեր առաջիկա անելիքները, որովհետեւ մեր նախորդ հանդիպման ընթացքում էլ ասել եմ, որ այս ընթացքում իմ ունեցած միջազգային շփումները բերել են այն եզրակացության, որ, ցավոք սրտի, միջազգային ասպարեզում շատ դեպքերում կորսվել է Լեռնային Ղարաբաղի հարցի էության մասին պատկերացումն ու ընկալումը։ Սա մեր առաջիկա խնդիրներից կարեւորագույնն է, եւ ըստ էության անհրաժեշտ է հետեւողական աշխատանք տանել, որպեսզի Լեռնային Ղարաբաղի հարց ասելով միջազգային ասպարեզում հասկանան այն, ինչ նկատի է առնվում եւ ինչպիսին կա Լեռնային Ղարաբաղի հարցն իր էությամբ։
Մենք պետք է շարունակենք նաեւ Հայոց ցեղասպանության միջազգային ճանաչմանն ուղղված քաղաքականությունը։ Մենք հստակ արձանագրում ենք, որ Հայոց ցեղասպանության միջազգային ճանաչումը գլոբալ անվտանգության եւ ցեղասպանությունների կանխարգելման ուղղությամբ մեր կարեւոր ներդրումն է եւ մենք այդ հարցը դիտարկում ենք այս տեսանկյունից։
Շնորհակալություն հայտնելով մեր բոլոր դիվանագետներին իրենց ծառայության համար՝ ցանկանում եմ հատկապես ընդգծել այն դիվանագետներին, ովքեր այս շրջանում աշխատում են անկայուն տարածաշրջաններում, անվտանգային բարդ միջավայրերում։ Մասնավորապես, խորին հարգանքի է արժանի Հալեպում մեր գլխավոր հյուպատոսության անխափան աշխատանքը, չնայած նրան, որ շենքը ենթարկվել է հրթիռակոծության։ Նույնը պետք է ասել Բաղդադում մեր դեսպանության գործունեության մասին՝ չնայած այդ երկրում տիրող վտանգավոր իրավիճակին։
Անշուշտ, մեր արտաքին քաղաքականության առջեւ դրված խնդիրների հաջողությամբ իրագործումը կախված է մեր արտաքին գործերի նախարարության ողջ անձնակազմի, այդ թվում՝ արտերկրում մեր դեսպանությունների եւ հյուպատոսությունների միահամուռ աշխատանքից։
Ուստի, հարգելի դիվանագետներ, եւս մեկ անգամ շնորհավորում եմ ձեզ եւ ցանկանում ստեղծագործական նոր մոտեցումներ, որովհետեւ արդի ժամանակները ստեղծագործելու եւ նոր հաջողությունների հասնելու լայն հնարավորություններ են։ Բոլորիդ մաղթում եմ նորանոր ձեռքբերումներ՝ ի շահ եւ ի բարօրություն Հայաստանի Հանրապետության, Արցախի Հանրապետության եւ հայ ժողովրդի։
Պարոն Մնացականյան, անձամբ Ձեզ մաղթում եմ հաջողություններ, ինչպես ընդունված է ասել, այս դժվար եւ բարդ կոլեկտիվին առաջնորդելու գործում։ Նաեւ ուզում եմ իմ գնահատանքի խոսքն ասել Երրորդ հանրապետության արտաքին գործերի բոլոր նախարարներին՝ այն ջանքերի համար, որ նրանք ներդրել են Հայաստանի դիվանագիտական համակարգի կայացման համար։ Շնորհավոր Դիվանագետի օրը»։

08-03-2019





20-03-2019
Ավելի թափանցիկ եւ արդյունավետ պետական գնման համակարգ
Խորհրդարանականները կողմ են վերահսկողության մեխանիզմների մեծացմանը

ԱԺ ֆինանսավարկային ...


20-03-2019
«Մոսկվայի պետական համալսարանն ինձ համար հարազատ կրթօջախ է»
Հանրապետության նախագահ Արմեն Սարգսյանը երեկ հյուրընկալել է Մոսկվայի Միխայիլ ...


20-03-2019
Հյուրընկալել է Լեւոն Արոնյանին
Հանրապետության նախագահ Արմեն Սարգսյանը երեկ հյուրընկալել է Հայաստանի առաջատար ...


20-03-2019
Ավելի խորացնել երկկողմ հարաբերությունները
ՀՀ ԱԺ նախագահը հանդիպել է Բունդեսթագի նախագահի հետ



20-03-2019
Ընդունել է ամերիկահայ գործարար եւ բարերար Ջեյմս Թուֆենկյանին
Վարչապետ Նիկոլ Փաշինյանը երեկ ընդունել է ամերիկահայ գործարար, բարերար ...


20-03-2019
Քննարկվել են համագործակցության ընդլայնմանը վերաբերող հարցեր
Վարչապետ Նիկոլ Փաշինյանն ընդունել է Գերմանական զարգացման բանկի (KfW) ...


20-03-2019
Տավուշի նորանշանակ մարզպետը՝ Մայր Աթոռում
Երեկ Ն.Ս.Օ.Տ.Տ. Գարեգին Երկրորդ Ծայրագույն պատրիարք եւ Ամենայն հայոց ...



20-03-2019
Ինը տասնյակ ներդրումային ծրագիր՝ քննարկման փուլում
Տեղի է ունեցել ՀՀ վարչապետ Նիկոլ ...

20-03-2019
Իրանը Թուրքիայի հետ համատեղ գործողություններին չի մասնակցել
Երեկ թուրքական ԶԼՄ—ները, այդ թվում՝ TRT լրատվական ...

20-03-2019
«Միշտ ձգտել եմ նոր մարտահրավերների»
Ֆուտբոլի Հայաստանի ազգային հավաքականի կազմում 14 ...
USD
EURO
RUR
GEL
Եղանակը Երևանում
գիշերը +4... +6
ցերեկը +15... +17

Մեր մասին
Կապ
   Արխիվ

© 2006 Copyright Hayastany Hanrapetutyun daily © 2006 Design and development by WEBMAKER STUDIO