ՀՖՖ գործկոմը երեկվա նիստում հաստատել է 2020/21 թ. մրցաշրջանում հանրապետական ֆեդերացիայի հովանու ներքո անցկացվելիք պրոֆեսիոնալ մրցումների կանոնակարգը եւ «Վան» ակումբի մասնակցությունը մեր երկրի բարձրագույն խմբի հերթական առաջնությանը։
Օգոստոսի 14-ին մեկնարկող ազգային գլխավոր մրցաշարն անցկացվելու է 10 թիմի մասնակցությամբ՝ երեք շրջանով։ Առաջնության վերջնաժամկետ է սահմանվել հաջորդ տարվա մայիսի 31-ը։ Հայաստանի չեմպիոնը պարգեւատրվելու է հատուկ գավաթով, 40 ոսկե մեդալով, դիպլոմներով եւ 10 միլիոն դրամ մրցանակային գումարով։ Երկրորդ եւ երրորդ մեդալակիրների համար դրամական մրցանակներ չեն նախատեսված։ Հանրապետության գավաթակրի պարգեւավճարը 6 միլիոն դրամ է։
Հաշվետու նիստում գործկոմը հաստատեց նաեւ վետերան եւ գործող ֆուտբոլիստների աջակցության ժամանակավոր կոմիտե ստեղծելու որոշումը։ Այն ղեկավարելու է 90—ական թ. սկզբի Հայաստանի ազգային հավաքականի ավագ Արամայիս Տոնոյանը, իսկ կոմիտեի անդամներ են տարբեր սերունդների խաղացողներ Ռազմիկ Գրիգորյանը, Նորայր Մեսրոպյանը, Սամվել Պողոսյանը, Հակոբ Տեր—Պետրոսյանը, Արթուր Եդիգարյանը եւ Արթուր Քոչարյանը։