Հանրապետություն
Հասարակություն
Ներքին կյանք
Արտաքին քաղաքականություն
Տնտեսություն
Սոցիում
Մշակույթ
Գիտություն
Կրթություն
Առողջապահություն
 
Պաշտոնական
Նախագահ
Ազգային ժողով
Կառավարություն
ԱԳՆ
ՊՆ
Մայր Աթոռ
Այլք...
 
Երևան
Մարզեր
ԼՂՀ
Աշխարհ
Զանազան

27.09.2020
ՆԵՐՔԻՆ ԿՅԱՆՔ


Վարչապետը Երեւանում մասնակցել է վերակառուցված դպրոցի բացման արարողությանը

Վարչապետ Նիկոլ Փաշինյանը ներկա է գտնվել Երեւանի Ռաֆայել Իշխանյանի անվան N 153 հիմնական դպրոցի բացման արարողությանը: Ինչպես հայտնում են ՀՀ վարչապետի աշխատակազմի տեղեկատվության եւ հասարակայնության հետ կապերի վարչությունից, միջոցառմանը մասնակցել են նաեւ Երեւանի քաղաքապետ Հայկ Մարությանը, ՀՀ տարածքային կառավարման եւ ենթակառուցվածքների նախարար Սուրեն Պապիկյանը, կրթության, գիտության, մշակույթի եւ սպորտի նախարար Արայիկ Հարությունյանը եւ այլք:

Դիմելով ներկաներին՝ վարչապետն իր խոսքում նշել է.

«Հարգելի գործընկերներ,

Սիրելի ծնողներ,

Սիրելի աշակերտներ,

Շատ սիրելի առաջին դասարանցիներ,

Այսօր առավոտից մտածում եմ, թե ինչ ասեմ այս ամբիոնից, որն իսկապես իմաստալից լինի եւ օգնի ձեզ ձեր ամենօրյա կյանքում: Եվ ես մտածեցի մի այսպիսի նախադասություն, որ 21-րդ դարում առանց կրթության ոչինչ անել հնարավոր չէ: Եվ մտածեցի, որ հիմա մեր երեխաները շատ քննադատաբար են վերաբերվում ամեն ինչին, եւ նա, ով քննադատաբար է վերաբերվում, համոզված եմ՝ շատերը, այս նախադասությունն իր մեջ վերլուծելով, կարող է արձագանքել այսպես. օրինակ՝ առանց կրթության հնարավոր է «Մերսեդես G» կարգի, կամ ինչպես ժողովրդի մեջ են ասում, կներեք այս բառի համար, «յաշիկ» Մերսեդես ձեռք բերել: Ճի՞շտ է: Այո՛, կարող է այս նախադասությունը գոյություն ունենալ: Բայց եթե հնարավոր է առանց կրթության ձեռք բերել «G» կարգի «Մերսեդես», ապա առանց կրթության հնարավոր չէ ստեղծել «G» կարգի «Մերսեդես»:

Ինչպիսի՞ ապագա ենք ուզում Հայաստանի Հանրապետության համար: Մենք ուզում ենք պայմանականորեն «G» կարգի «Մերսեդեսի» վարողնե՞ր լինել միայն, թե՞ մենք ուզում ենք լինել դրա ստեղծողը, դրա արտադրողը: Մենք ուզում ենք լինել սպառո՞ղ, թե՞ ստեղծող: Առանց կրթության, այո, հնարավոր է ինչ-որ աստիճանի նյութական բարեկեցություն ստեղծել, բայց առանց կրթության հնարավոր չէ տիեզերք թռչել: Ես ուզում եմ, որ սա լինի մեր ընտրությունը: Մենք ի՞նչ ենք ուզում, ինչպիսի՞ ապագա ենք ուզում տեսնել ձեզ համար. որ դուք առավոտյան արթնանաք, մոտենաք ձեր խոհանոցին, բացեք ձեր սառնարանը եւ այնտեղ տեսնեք տարատեսակ սննդամթերք, ուտելիքներ՝ երիշիկներ, պանիրներ, մուրաբաներ, թե՞ մենք ուզում ենք, որ դուք առավոտյան արթնանաք, ունենաք շատ քաղաքակիրթ, առողջ նախաճաշ եւ շատ արագ գնաք զբաղվելու տիեզերքը նվաճելու ձեր ամենօրյա գործով:

Ես ուզում եմ, որ մենք բոլորս եւ հատկապես՝ դուք՝ սիրելի աշակերտներ, սիրելի երեխաներ, ընկալեք, որ ամեն րոպեն, ամեն ժամը, որ դուք անցկացնում եք այս պատերի ներսում՝ կարեւոր է: Այն, թե ձեր կրթական օրակարգի մեջ ամեն րոպեն ինչպես եք անցկացնում, դրանով է որոշվում, թե ինչպես եք ապրելու դուք, թե ինչպիսի երկրում եք ապրելու դուք, ինչպես են ապրելու ձեր երեխաները, ինչպես են ապրելու ձեր ընտանիքները: Եվ ես ուզում եմ, որ դուք ձեր առաջ ոչ թե նպատակ դնեք ունենալ ամենատարբեր փայլուն, ճոխ, թանկ, պսպղան առարկաներ, այլ ուզում եմ, որ դուք ձեր առաջ նպատակ դնեք երջանիկ լինելու ձեր ամենօրյա աշխատանքի մեջ: Եվ այս պարագայում ես հավաստիացնում եմ՝ մնացած բոլոր նյութականը կստեղծվի այնպես, որ դուք ինքներդ անգամ չեք նկատի դա»:

Նիկոլ Փաշինյանը հավելել է՝ իր ցանկությունն է, որ երջանկությունը լինի աշակերտների ամենակարեւոր նպատակը եւ ոչ թե ոսկին: «Ես ուզում եմ, որ ուրիշներին երջանկություն պարգեւելը լինի ձեր ամենակարեւոր առաքելությունը, որովհետեւ ուրիշներին երջանկացնելու մեջ է ամենակարեւոր երջանկությունը: Եվ ես հավատում եմ, գիտեմ, որ դուք հենց այդպիսին եք: Ես գիտեմ, որ ձեր ծնողների երազանքները հենց այդպիսին են»,- ասել է վարչապետը:

Կառավարության ղեկավարի խոսքով՝ գործադիրի մեծագույն նպատակն է, խնդիրն է, որ Հայաստանում կրթությունը, սովորելը լինեն ազգային ապրելակերպ, ազգային կենսակերպ: Վարչապետն ընդգծել է՝ միայն սովորելով է, միայն գիտելիքով է, միայն կրթությամբ է, որ մենք կարող ենք ճանաչել մեր խնդիրները եւ դրանց լուծումը գտնել՝ սկսած առողջականից, վերջացրած սոցիալականով ու տնտեսականով:

«Եվ ես ուզում եմ, որ դուք պատրաստ լինեք վաղվա այն պատասխանատվությանը, որն անխուսափելիորեն ծանրանալու է ձեր ուսերին: Այսօր դուք դպրոցում ձեր կրթության ընթացքում մարզվում եք եւ պիտի մարզվեք, բառիս բուն եւ փոխաբերական իմաստով, ունենաք ուժեղ մարմին, ունենաք ուժեղ միտք, ուժեղ նպատակներ, որպեսզի վաղը, երբ պատասխանատվությունը ծանրանա ձեր ուսերին՝ այն կրեք հաճույքով, այն կրելու արդյունքում դուք ձեզ զգաք երջանիկ, առաջին հերթին, ամենօրյա աշխատանքով վայելեք ձեր աշխատանքի ստեղծագործական երջանկությունը:

Մեր ճակատագիրը դասավորվեց այնպես, որ այսօր արդեն ձեր փոքրիկ ուսերին ծանրացել է որոշակի պատասխանատվություն: Դուք այսօր դպրոց եք մտնում դիմակներով: Մենք բոլորս հասկանում ենք, թե ինչպիսի մեծ անհարմարություն է դիմակով ապրելը, դիմակով իրար հետ հարաբերվելը: Չնայած վերջերս ես նկատեցի՝ իմ ամենամեծ մտավախությունը դիմակներից այն է, որ այն ծածկում է մեր ժպիտները: Ճի՞շտ է: Բայց նաեւ նկատեցի, որ աչքերն ավելի ուժեղ են արտահայտում մեր ժպիտը, ավելի ճիշտ՝ մեր աչքերն օգնում են, որ դրանք ավելի արտահայտիչ լինեն: Այնպես որ, այսօրվանից այդ պատասխանատվությունն ընկել է ձեզ վրա. սա մի կողմից վատ է, որովհետեւ ճգնաժամի եւ համավարակի բերումով է, բայց մյուս կողմից էլ լավ է, որ այսօրվանից դուք կարող եք ինքներդ դաստիարակել ձեզ՝ պատասխանատու լինելու ինքներդ ձեր նկատմամբ, ձեր տատիկների, պապիկների, ծնողների, ընկերների նկատմամբ: Եվ դիմակ կրելու պատասխանատվությունը, սոցիալական հեռավորությունը պահելու պատասխանատվությունը ճգնաժամի եւ համավարակի դեմ պայքարելու ձեր բաժին փոքրիկ պատասխանատվությունը ձեզ համար շատ կարեւոր կրթական նշանակություն կունենան»,- նկատել է վարչապետը:

Նիկոլ Փաշինյանը շնորհավորել է աշակերտներին ուսումնական տարվա մեկնարկի եւ վերակառուցված դպրոց ունենալու կապակցությամբ: Վարչապետը հույս է հայտնել, որ նոր դպրոցը կլցվի նոր բովանդակությամբ, եւ այդ բովանդակությունը կլինի պարուրված, պարփակված այս երեք կարգախոսի մեջ՝ «ուժեղ եւ երջանիկ անհատ», «ուժեղ եւ երջանիկ ժողովուրդ», «ուժեղ եւ երջանիկ պետություն՝ Հայաստանի Հանրապետություն»:

«Եվ դուք՝ որպես Հայաստանի Հանրապետության հպարտ քաղաքացիներ, քայլեք հպարտ գիտելիքի, կրթության, ուսման ճանապարհով եւ դրեք ձեր առաջ բարձր նշաձողեր՝ փոխելու ձեր քաղաքը, փոխելու ձեր երկիրը եւ փոխելու աշխարհը: Դուք պիտի հավատաք աշխարհը փոխելու ձեր ուժին եւ պիտի անպայման փոխեք աշխարհը»,- նշել է վարչապետը:

Այնուհետեւ կառավարության ղեկավարը շրջել է դպրոցով՝ ծանոթացել իրականացված աշխատանքներին եւ աշակերտների համար ստեղծված պայմաններին:

700 աշակերտ ունեցող դպրոցը վերակառուցվել է ՀՀ կառավարության եւ Ասիական զարգացման բանկի միջեւ իրականացվող դպրոցների սեյսմիկ անվտանգության բարելավման ծրագրի շրջանակում: Արդյունքում այսօր դպրոցը կարող է ընդունել մինչեւ 950 աշակերտ:

Վերակառուցման աշխատանքների ընդհանուր բյուջեն կազմել է 1,4 մլրդ դրամ։

Նոր, լուսավոր ու հարմարավետ պայմաններ են ստեղծվել դասասենյակներում, մարզադահլիճում ու հանդիսությունների դահլիճում, գրադարանում: Եռահարկ դպրոցն այսօր հարմարեցված է նաեւ հենաշարժողական խնդիրներ ունեցող երեխաների համար. կառուցվել են թեքահարթակներ, տեղադրվել է վերելակ, հարմարեցվել են նաեւ պետքարանները:

Հիմնանորոգման աշխատանքների ընթացքում տանիքին տեղադրվել է արեւային էներեգիայի համակարգ, որն ապահովելու է դպրոցի տաք ջուրը: Դպրոցի բակում էլ կառուցվել է նոր խաղադաշտ: Դպրոցն իրականացնում է 9-ամյա կրթություն:

16-09-2020





26-09-2020
Կտրուկ քայլ՝ տեղական արտադրությունը պաշտպանելու համար
Արգելվում է Հայաստանի համար ռազմավարական նշանակության սեւ եւ գունավոր ...


26-09-2020
Ճնշում է գործադրվում Կիպրոսի վրա
ԱՄՆ-ը պնդում է այլեւս չարգելափակել Բելառուսի նկատմամբ ԵՄ-ի պատժամիջոցների ...


26-09-2020
Իդլիբը՝ Մոսկվայի ու Անկարայի միջեւ
Ստատուս-քվոն պահպանվում է

Մոսկվան ու Անկարան որոշում են ...


26-09-2020
Էներգախնայողությունը` էներգիայի նոր աղբյուր
Ինչ ներուժ ունի Հայաստանը եւ ինչ քայլեր է ձեռնարկում ...


26-09-2020
Նա՝ մեր անլռելի զանգակատունը
Սերմ էր, որ ընկնելու էր հողի մեջ, որպեսզի հողը ...


26-09-2020
Հումանիտար ականազերծման կենտրոն՝ Արցախում
Հիմնադիրներն արցախյան պատերազմի մարտական սպաներն են

Երկրորդ ամիսն ...


26-09-2020
Ինչպես ենք մենք վայելում Աստծուն
Որպեսզի ընդունենք Աստծուն, մենք պարտավոր ենք դեմքով շրջվել դեպի ...



26-09-2020
«Հայաստանի հետ պետք չէ խոսել ուժի եւ սպառնալիքի լեզվով»
ՀՀ վարչապետ Նիկոլ Փաշինյանը կառավարությունում ...

26-09-2020
Դավիթ Տոնոյանը ՌԴ-ում ներկա է «Կովկաս-2020» զորավարժության հիմնական փուլին
ՀՀ պաշտպանության նախարար Դավիթ Տոնոյանն ...

26-09-2020
ՀՀ նախագահը շնորհավորել է «Ավրորա» մրցանակաբաշխության 5-ամյակը
Հայաստանի Հանրապետության նախագահ Արմեն Սարգսյանը ...

26-09-2020
Արոնյանը ձգտում է եզրափակիչ
Լեւոն Արոնյանը երկրորդ հաղթանակը տանելով ...
USD
EURO
RUR
GEL
Եղանակը Երևանում
գիշերը +16... +19
ցերեկը +24... +26

Մեր մասին
Կապ
   Արխիվ

© 2006 Copyright Hayastany Hanrapetutyun daily © 2006 Design and development by WEBMAKER STUDIO