Ուդոն նույնպես կխաղա Ղազախստանում

Հայաստանի ֆուտբոլի ազգային ընտրանու կիսապաշտպան Սոլոմոն Ուդոն Երեւանի «Արարատից» տեղափոխվել է Ղազախստանի Կարագանդա քաղաքի «Շախտյոր» ակումբ։
Այդ մասին տեղեկացրել է մայրաքաղաքային թիմի մամուլի ծառայությունը: Նշվում է, որ նիգերիացի 25-ամյա ֆուտբոլիստը նոր ակումբի կազմում արդեն ուսումնամարզական հավաքի է մասնակցում Թուրքիայում: Ուդոն անցյալ տարվա սեպտեմբերին էր համալրել «Արարատը», որից առաջ հանդես էր գալիս Գյումրիի «Շիրակում»։ Ավելի վաղ պաշտպանել է նաեւ Երեւանի «Ուրարտուի» մարզական պատիվը։ 2020-ի հունիսին հայտարարվեց Հայաստանի հավաքականին Ուդոյի միանալու մասին։ Մեր երկրի գլխավոր թիմում նա նորամուտը նշեց անցյալ տարվա հոկտեմբերի 14-ին տեղի ունեցած՝ Էստոնիայի հավաքականի հետ խաղում՝ 42-րդ րոպեին փոխարինելով վնասվածք ստացած Արտակ Գրիգորյանին։ Դա Հայաստանի դրոշի ներքո աֆրիկացի մարզիկի անցկացրած առայժմ միակ հանդիպումն է։

Հրայր ՆԱԶԱՐՅԱՆ

23-02-2021